नवी दिल्ली, १४ ऑक्टोबर (हिं.स.)पॅरिस ऑलिंपिक २०२४ चा कांस्यपदक विजेता कुस्तीगीर अमन सेहरावतने जागतिक अजिंक्यपद स्पर्धेत वजन कमी करण्यात अपयशी ठरल्यानंतर त्याच्यावर लादलेली एक वर्षाची बंदी उठवण्याची विनंती WFI कडे केली आहे.

भारतीय ऑलिंपिक असोसिएशन (IOA) ने आयोजित केलेल्या सत्कार समारंभात, अमनने कबूल केले की, त्याने चूक केली आहे, तो म्हणाला की ही त्याची पहिली चूक आहे. त्याने सांगितले की, तो WFI अध्यक्ष संजय सिंग यांना वैयक्तिकरित्या निर्णयावर पुनर्विचार करण्यासाठी आवाहन करेल.

अमन म्हणाला, मी त्यांना भेटून विनंती करेन. ही माझी पहिली चूक आहे, ती पुन्हा होणार नाही.

WFI ने २३ सप्टेंबर २०२५ रोजी अमनला कारणे दाखवा नोटीस बजावली. २९ सप्टेंबर रोजी त्याचा प्रतिसाद असमाधानकारक आढळल्यानंतर, शिस्तपालन समितीने एक वर्षाची बंदी घालण्याची शिफारस केली.

स्पर्धेच्या आदल्या दिवशी अचानक पोटदुखी झाल्यामुळे अमन वजन कमी करण्याची प्रक्रिया पुढे चालू ठेवू शकला नाही असे स्पष्ट केले.

तो म्हणाला, माझ्याकडे फक्त ६००-७०० ग्रॅम वजन कमी करायचे होते. पण अचानक मला पोटदुखीचा त्रास जाणवला आणि मी थेट माझ्या खोलीत गेलो. औषध घेतल्यानंतरही माझी प्रकृती सुधारली नाही.

अमन जागतिक अजिंक्यपद स्पर्धेत ५७ किलो फ्रीस्टाइल प्रकारात भारताचा पदकाचा आशावादी होता, परंतु १.७ किलो जास्त वजन असल्याने त्याला स्पर्धेतून अपात्र ठरवण्यात आले. त्यानंतर, WFI ने २३ सप्टेंबरपासून त्याच्यावर एक वर्षाची बंदी घातली.

अमन म्हणाला की या बंदीमुळे त्याच्या कारकिर्दीवर मोठा परिणाम होईल. तो म्हणाला, पुढील वर्षी आशियाई खेळ आणि जागतिक अजिंक्यपद स्पर्धा यासारख्या मोठ्या स्पर्धा येत आहेत. आशियाई खेळ दर चार वर्षांनी एकदा आयोजित केले जातात. ही संधी गमावणे माझ्यासाठी मोठे नुकसान ठरेल.

तो म्हणाला की तो WFI अध्यक्षांना भेटण्याची आणि क्रीडा मंत्रालयाची मदत घेण्याची योजना आखत आहे. तो म्हणाला, आम्ही आमचे सर्वोत्तम प्रयत्न करू. आम्ही क्रीडा मंत्रालयालाही विनंती करू.

अमन सेहरावतने २०२४ च्या पॅरिस ऑलिंपिकमध्ये ५७ किलो वजनी गटात कांस्यपदक जिंकले होते आणि तो देशातील उदयोन्मुख कुस्तीपटूंपैकी एक मानला जातो. त्याचे पुढील ध्येय २०२६ च्या आशियाई अजिंक्यपद आणि २०२६ च्या आशियाई खेळांमध्ये पदके जिंकणे आहे.

---------------

हिंदुस्थान समाचार / वृषाली देशपांडे