नवी दिल्ली, १६ ऑक्टोबर, (हिं.स.): आगामी इंडियन प्रीमियर लीग हंगामापूर्वी न्यूझीलंडचा दिग्गज फलंदाज केन विल्यमसन लखनौ सुपर जायंट्समध्ये स्ट्रॅटेजिक अ‍ॅडव्हायझर म्हणून सामील झाला आहे. फ्रँचायझीचे मालक संजीव गोएंका यांनी सोशल मीडिया प्लॅटफॉर्म 'एक्स' वर पोस्ट करून ही माहिती दिली.

गोएंका यांनी लिहिले की, केन हा बऱ्याच काळापासून सुपर जायंट्स कुटुंबाचा भाग आहे आणि आम्हाला त्याचे स्ट्रॅटेजिक अ‍ॅडव्हायझर म्हणून पुन्हा स्वागत करताना आनंद होत आहे. त्याचे नेतृत्व, स्ट्रॅटेजिक समज, खेळाचे सखोल ज्ञान आणि क्रिकेटपटूंना प्रेरित करण्याची क्षमता संघासाठी अमूल्य ठरेल.

विल्यमसन एसए२० लीगमध्ये सुपर जायंट्सच्या डर्बन संघाशी देखील संबंधित आहे. विल्यम्सन शेवटचा न्यूझीलंडकडून या वर्षी मार्चमध्ये चॅम्पियन्स ट्रॉफीच्या अंतिम फेरीत खेळला होता. त्याने अद्याप आंतरराष्ट्रीय क्रिकेटमधून निवृत्ती घेतलेली नाही. आणि तो न्यूझीलंड क्रिकेटसोबत कॅज्युअल करारावर आहे. तो इंग्लंडविरुद्धच्या टी-२० मालिकेत खेळणार नाही. पण २६ ऑक्टोबरपासून सुरू होणाऱ्या एकदिवसीय मालिकेत तो परतण्याची अपेक्षा आहे.

विल्यमसनला आयपीएलमध्ये व्यापक अनुभव आहे. जरी गेल्या तीन हंगामात त्याचे मैदानावरील योगदान मर्यादित राहिले आहे. गुजरात टायटन्सकडून खेळताना २०२३ च्या आयपीएल हंगामातील पहिल्याच सामन्यात त्याला गुडघ्याला दुखापत झाली. २०२४ मध्ये तो फक्त दोन सामने खेळला. २०२५ च्या मेगा लिलावात तो विक्रीला आला नाही. त्याने अलीकडेच इंग्लंडच्या द हंड्रेड लीगमध्ये लंडन स्पिरिटसाठी 8 डावांमध्ये २०४ धावा केल्या.

विल्यमसनला कोचिंग किंवा सपोर्ट स्टाफचा अनुभव नसला तरी, तो त्याच्या धोरणात्मक समज आणि नेतृत्व कौशल्यासाठी जगभरात प्रसिद्ध आहे. त्याने २०१९ मध्ये न्यूझीलंडला विश्वचषक अंतिम फेरीत नेले आणि २०२१ मध्ये जागतिक कसोटी अजिंक्यपद जिंकले.

आता तो ऋषभ पंतच्या नेतृत्वाखाली आणि जस्टिन लँगरच्या प्रशिक्षकपदाखाली एलएसजी संघात सामील होईल. संघाने गेल्या दोन हंगामात चांगली कामगिरी केलेली नाही, सलग सातवे स्थान पटकावले आहे. विल्यमसनची धोरणात्मक भूमिका संघाला नवीन दिशा आणि ताकद देईल अशी फ्रँचायझीला आशा आहे.

---------------

हिंदुस्थान समाचार / वृषाली देशपांडे