नवी मुंबई , 31 ऑक्टोबर (हिं.स.)।महिला विश्वचषक 2025 मध्ये टीम इंडिया ने अप्रतिम खेळ करत फायनलमध्ये आपले स्थान निश्चित केले आहे. उपांत्य सामन्यात भारताने सात वेळच्या विजेत्या ऑस्ट्रेलियाला पराभूत करून इतिहास रचला. या दरम्यान माजी भारतीय कर्णधार सुनील गावस्कर यांनी एक मजेशीर वादा केला आहे. त्यांनी म्हटले आहे की, “जर भारताने हा विश्वचषक जिंकला, तर मी जेमिमा रॉड्रिग्ज सोबत ड्युएट गाणे गाईन.”

गावस्कर यांनी माध्यमांशी बोलताना सांगितले, “जर भारत विश्वचषक जिंकला आणि जेमिमा तयार असेल, तर आम्ही दोघे मिळून एक गाणे गाऊ. ती गिटार वाजवेल आणि मी गाईन.” त्यांनी आठवण करून दिली की बीसीसीआय अवॉर्ड 2024 मध्ये त्यांनी आणि जेमिमाने आधीही ‘क्या हुआ तेरा वादा’ हे गाणे एकत्र सादर केले होते. त्या वेळी जेमिमा गिटार वाजवत होती आणि गावस्कर गात होते. गावस्कर हसत म्हणाले, “जर ती पुन्हा एका म्हाताऱ्या माणसासोबत गाणे गाण्यास तयार असेल, तर मी पुन्हा पूर्णपणे तयार आहे!” पुढे बोलताना गावस्कर यांनी जेमिमाच्या फिल्डिंगचे विशेष कौतुक केले. ते म्हणाले, “लोक तिच्या फलंदाजीबद्दल बोलत आहेत, पण तिने क्षेत्ररक्षणातही अप्रतिम कामगिरी केली आहे. तिच्या दोन अप्रतिम रनआउट्समुळे ऑस्ट्रेलियाचा स्कोअर ३५० च्या वर जाऊ शकला नाही. ती एक अनुभवी खेळाडू आहे — तिने परदेशातील लीग स्पर्धांमध्येही खेळले आहे. खेळ समजून घेण्याची आणि परिस्थिती सांभाळण्याची तिची क्षमता उत्कृष्ट आहे.”

आता भारताचा फायनल सामना रविवारी दक्षिण आफ्रिकेविरुद्ध होणार आहे. गावस्कर यांच्या मते, घरच्या मैदानाचा फायदा आणि संघाचा सध्याचा फॉर्म पाहता टीम इंडिया ट्रॉफीची सर्वात मोठी दावेदार आहे. त्यांनी म्हटले , “संघाचा आत्मविश्वास सध्या शिखरावर आहे. जर ते या लयीत खेळत राहिले, तर विश्वचषक ट्रॉफी निश्चितच भारताचीच असेल.”भारताच्या या ऐतिहासिक विजयात जेमिमा रॉड्रिग्जने झळकावलेली खेळी निर्णायक ठरली. तिने ऑस्ट्रेलियाविरुद्ध १३४ चेंडूत नाबाद १२७ धावा करत भारताला ३३९ धावांच्या विशाल लक्ष्याचा पाठलाग पूर्ण करून दिला. हा महिला विश्वचषकाच्या नॉकआउट सामन्यांमधील सर्वात मोठा सामना ठरला. कर्णधार हरमनप्रीत कौर सोबत जेमिमाने तिसऱ्या गडीसाठी १६७ धावांची भागीदारी केली. हरमनप्रीत बाद झाली, पण जेमिमा शेवटपर्यंत नाबाद राहून भारताला विजयापर्यंत पोहोचवले.

---------------

हिंदुस्थान समाचार / Priyanka Bansode