नवी दिल्ली , 6 ऑक्टोबर (हिं.स.)।भारतीय वायुदल ८ ऑक्टोबर रोजी आपला ९३वा वायुसेना दिवस साजरा करणार असून हा दिवस ऑपरेशन सिंदूर मध्ये भाग घेणाऱ्या वीर योद्ध्यांना समर्पित करण्यात येणार आहे. शौर्याच्या या परंपरेला पुढे नेत, वायुदल आपल्या साहसी योद्ध्यांना त्यांच्या अद्वितीय धैर्य आणि शौर्यासाठी एकूण ९७ वीरता पुरस्कारांनी सन्मानित करणार आहे. यासोबतच, ऑपरेशन सिंदूर दरम्यान असाधारण पराक्रम दाखवलेल्या सात आघाडीच्या स्क्वॉड्रन्सना ‘युनिट प्रशस्ति पत्र’ देण्यात येणार आहे, ज्यांनी पाकिस्तानचे जवळपास सर्व हवाई हल्ले निष्फळ ठरवले.

ऑपरेशन सिंदूरमध्ये निर्णायक भूमिका बजावलेल्या वायुदलाच्या अत्याधुनिक युनिट्समध्ये ‘एस-४०० ट्रायम्फ एअर डिफेन्स रेजिमेंट’ या लांब पल्ल्याच्या हवाई आणि बॅलिस्टिक क्षेपणास्त्र धोके रोखू शकणाऱ्या रेजिमेंटने पाकिस्तानच्या क्षेपणास्त्र धमक्यांना यशस्वीपणे निष्क्रिय केले. या अद्वितीय कामगिरीबद्दल यांना युनिट प्रशस्ति पत्र देण्यात आले आहे.राफेल फायटर जेट्स (क्रमांक १७ स्क्वॉड्रन “गोल्डन एरोज”) या आधुनिक एव्हिओनिक्स व लांब पल्ल्याच्या एअर-टू-एअर आणि एअर-टू-ग्राउंड शस्त्रांनी सज्ज राफेल विमानांनी हे सुनिश्चित केले की कोणतेही पाकिस्तानी विमान भारतीय हवाई हद्दीत घुसू शकले नाही. यासाठी या स्क्वॉड्रनला युनिट प्रशस्ति पत्र मिळणार आहे. सु-३० एमकेआय विथ ब्रह्मोस (क्रमांक २२२ स्क्वॉड्रन “टायगर शार्क्स”) या ब्रह्मोस एअर-लाँच क्रूझ मिसाईलने सुसज्ज सु-३० एमकेआय विमानांनी अचूक आणि खोल घुसखोरी करून दहशतवादी तळांवर आणि महत्त्वाच्या लक्ष्यांवर हल्ले केले. यामुळे त्यांनाही युनिट प्रशस्ति पत्र देण्यात येणार आहे.लोइटरिंग-म्यूनिशन युनिट ही विशेष युनिट शत्रू प्रदेशावर सातत्याने नजर ठेवत होती आणि क्षणभंगुर, उच्च-मूल्य व तातडीच्या लक्ष्यांवर अचूक हल्ले करून शत्रूच्या संरक्षण व्यवस्थेला विध्वस्त करत होती. युद्धामधील क्षति मूल्यांकनाचे कामही तिने प्रत्यक्ष युद्धस्थळी केले. ऑपरेशन सिंदूरमध्ये युद्धक्षमता अनेक पटींनी वाढवल्याबद्दल यांना युनिट प्रशस्ति पत्र देण्यात येणार आहे.

युनिट्सच्या सन्मानासोबतच, जे एअर वॉरियर्स थेट ऑपरेशन सिंदूरमध्ये सहभागी झाले आणि कर्तव्य बजावत असताना अपूर्व शौर्य दाखवले, त्यांना वायुसेना दिवसाच्या निमित्ताने वीरता पुरस्कार प्रदान करण्यात येणार आहेत. राफेल, सु-३० एमकेआय विथ ब्रह्मोस, एस-४०० एअर डिफेन्स सिस्टम, लोइटरिंग-म्यूनिशन युनिट, आणि वायुदलाच्या वैयक्तिक साहसी योद्ध्यांनी पाकिस्तानच्या हवाई हल्ल्यांना निर्णायकपणे निष्फळ ठरवले आणि त्यांच्या आक्रमण क्षमतेला चिरडून टाकले. ही कामगिरी भारतीय वायुदलाची प्रगत तंत्रज्ञानातील आघाडी, व्यावसायिक कौशल्य आणि अजेय जिद्द अधोरेखित करते.

---------------

हिंदुस्थान समाचार / Priyanka Bansode