मुंबई, 15 नोव्हेंबर (हिं.स.)। कावासाकी इंडियानं भारतीय बाइकप्रेमींसाठी नवी अपडेटेड Z1100 सुपरबाइक बाजारात सादर केली आहे. 12.79 लाख रुपयांच्या एक्स-शोरूम किंमतीत उपलब्ध झालेल्या या 2026 मॉडेलमध्ये किरकोळ डिझाइन बदलांसह महत्त्वपूर्ण तांत्रिक सुधारणा करण्यात आल्या आहेत. अधिक आक्रमक लुक, अत्याधुनिक इलेक्ट्रॉनिक्स आणि प्रगत सस्पेन्शन यामुळे ही सुपरबाइक परफॉर्मन्स रायडर्ससाठी आकर्षण ठरणार आहे.

नव्या Z1100 च्या कोअरमध्ये 1,099 सीसी इंजिन असून ते 9,000 आरपीएमवर 134 एचपीची शक्ती आणि 7,600 आरपीएमवर 113 एनएमचा कमाल टॉर्क निर्माण करतं. सहा-स्पीड गिअरबॉक्ससोबत जोडलेलं असिस्ट आणि स्लिपर क्लच या इंजिनला अधिक स्मूद आणि उच्च दर्जाची राइडिंग क्षमता देतं.

बाईक निंजा 1100SX प्रमाणेच अ‍ॅल्युमिनियम फ्रेमवर ही दुचाकी तयार करण्यात आली आहे. स्टँडर्ड व्हेरिएंटमध्ये शोवा फोर्क्स तर एसई व्हेरिएंटमध्ये शोवा फोर्क आणि ओहलिन्स S46 मोनोशॉक दिलं आहे. रिमोट प्रीलोड ॲडजस्टरसह येणारं हे सस्पेन्शन सेटअप विविध रस्त्यांवर उत्कृष्ट स्थिरता आणि आराम सुनिश्चित करतं.

ब्रेकिंगच्या बाबतीतही कावासाकीनं सुधारणा केल्या असून निंजा 1100SX प्रमाणेच टोकिको रेडिअल कॅलिपर्ससोबत 310 मिमीचे ड्युअल डिस्क बसवले आहेत. स्टील-ब्रेडेड ब्रेक लाइन्स आणि अधिक मजबूत 32 कॅलिपर्समुळे ब्रेकिंग क्षमता लक्षणीय वाढली आहे, जी उच्च वेगातही सुरक्षित थांबणं सुनिश्चित करते.

या सुपरबाइकमध्ये फुल आणि लो असे दोन पॉवर मोड्स, तीन स्तरांचा ट्रॅक्शन कंट्रोल, द्विदिश क्विकशिफ्टर, क्रूज कंट्रोल आणि ड्युअल-चॅनेल ABS ही प्रगत वैशिष्ट्ये देण्यात आली आहेत. पाच-अक्ष आयएमयू (इनर्शिअल मेजरमेंट युनिट)तंत्रज्ञानामुळे या सर्व इलेक्ट्रॉनिक असिस्टन्स सिस्टम्स अधिक अचूकपणे कार्य करतात.

किरकोळ डिझाइन बदलांमुळे Z1100 ला अधिक आक्रमक आणि प्रीमियम लुक मिळाला आहे. लॉंचनंतर बुकिंग अधिकृतपणे सुरू झाली असून डिलिव्हरी लवकरच सुरू होणार आहे. शक्ती, सुरक्षितता आणि अत्याधुनिक तंत्रज्ञानाचा अभूतपूर्व मेळ साधणारी अपडेटेड Z1100 सुपरबाइक भारतीय राइडर्ससाठी एक प्रभावी पर्याय ठरणार आहे.

---------------

हिंदुस्थान समाचार / Suraj Chaugule