लिस्बन, १७ नोव्हेंबर (हिं.स.)पोर्तुगालने पोर्तो येथील एस्टाडिओ डो ड्रागो येथे झालेल्या त्यांच्या शेवटच्या विश्वचषक पात्रता सामन्यात आर्मेनियाचा ९-१ असा पराभव करून २०२६ फिफा विश्वचषकासाठी पात्रता मिळवली. या विजायसह पोर्तुगाल सातव्यांदा विश्वचषकासाठी पात्र ठरला आहे.
रॉबर्टो मार्टिनेझच्या संघाने निलंबित क्रिस्टियानो रोनाल्डोच्या अनुपस्थितीत शानदार कामगिरी केली. पुढील वर्षी होणाऱ्या विश्वचषकात स्थान निश्चित करण्यासाठी पोर्तुगालला विजयाची आवश्यकता होती आणि संघाने दोन हॅट्रिकसह प्रभावीपणे हे यश मिळवले आहे. एक ब्रुनो फर्नांडिसची आणि दुसरी तरुण जोआओ नेव्हेसची.
आतापर्यंत फिफा विश्वचषकात पोर्तुगालची कामगिरी
फिफा विश्वचषकात पोर्तुगालची कामगिरी रोलरकोस्टर राईड राहिली आहे. संघाने पहिल्यांदा १९६६ मध्ये भाग घेतला आणि उत्कृष्ट कामगिरी केली, तिसऱ्या स्थानावर राहिला, सहा सामन्यांमध्ये पाच विजय आणि फक्त एक पराभव त्यांना सहन करावा लागला होता.
यानंतर १९८६ आणि २००२ च्या विश्वचषकात पोर्तुगालची कामगिरी गट टप्प्यापुरती मर्यादित राहिली, संघाने प्रत्येकी तीन सामने जिंकले आणि दोन गमावले.
२००६ च्या विश्वचषकात, पोर्तुगालने आपल्या फुटबॉल इतिहासातील दुसऱ्या क्रमांकाची सर्वोत्तम कामगिरी केली आणि चौथे स्थान मिळवले. संघाने सात सामने खेळले, चार जिंकले, एक बरोबरी साधली आणि दोन गमावले. २०१० मध्ये, संघ प्री-क्वार्टरफायनलमध्ये पोहोचला, जिथे त्याने चार जिंकले, दोन बरोबरी साधली आणि एक गमावला.
२०१४ मध्ये, पोर्तुगाल गट टप्प्यातून बाहेर पडला, तीन सामन्यांपैकी एक जिंकला, दोन बरोबरी साधली आणि एक गमावला. २०१८ मध्ये, संघ पुन्हा प्री-क्वार्टरफायनलमध्ये पोहोचला, चार जिंकले, दोन बरोबरी साधली आणि एक गमावला.
पोर्तुगालने अलीकडील २०२२ च्या विश्वचषकात चांगली कामगिरी केली, पाच सामन्यांपैकी तीन विजयांसह उपांत्यपूर्व फेरीत पोहोचला. आता, २०२६ च्या विश्वचषकासाठी पात्र ठरल्यानंतर, संघाची आणखी एक मजबूत मोहीम असण्याची अपेक्षा आहे.
---------------
हिंदुस्थान समाचार / वृषाली देशपांडे
