एआयडीच्या अध्यक्षांनी घेतली देवेंद्र फडणवीसांची भेट

नागपूर, 20 नोव्हेंबर (हिं.स.) : असोसिएशन फॉर इंडस्ट्रियल डेव्हलपमेंटने (एआयडी) गडचिरोलीमध्ये स्वतंत्र ‘स्टील क्लस्टर’ उभारण्यासाठीचा सविस्तर प्रस्ताव महाराष्ट्राचे मुख्यमंत्री देवेंद्र फडणवीस यांच्याकडे औपचारिकरीत्या सादर केला आहे. एआयडीचे अध्यक्ष आशिष काळे यांनी नागपूर येथे मुख्यमंत्री फडणवीस यांची भेट घेऊन ‘गडचिरोली स्टील हब’ विकसित करण्याबाबतचे संकल्पना पत्र सुपूर्त केले.

सादर करण्यात आलेल्या कन्सेप्ट नोटमध्ये गडचिरोली स्टील हबला शाश्वत, जागतिक स्तरावर स्पर्धात्मक आणि मूल्यवर्धनावर आधारित उत्पादकतेचे केंद्र म्हणून विकसित करण्याचा प्रस्ताव आहे. राज्यात उपलब्ध असलेल्या विपुल लोखंड धातू साठ्यांचा स्थानिक पातळीवर वापर, मोठ्या प्रमाणावर रोजगार निर्मिती आणि संतुलित प्रादेशिक विकासाला चालना देण्यावर या प्रस्तावाचा भर आहे.

‘ऍडव्हान्टेज विदर्भ 2025’ मधील चर्चांचा आधार

हा प्रस्ताव ‘ऍडव्हान्टेज विदर्भ 2025’ परिषदेत झालेल्या महत्त्वपूर्ण चर्चांवर आधारित आहे. या परिषदेत JSW समूहाचे चेअरमन सज्जन जिंदाल आणि लॉयड्स मेटल्स अँड एनर्जी लिमिटेडचे व्यवस्थापकीय संचालक बी. प्रभाकरण यांसारख्या उद्योग क्षेत्रातील दिग्गजांनी मोठ्या एकात्मिक स्टील प्रकल्पांना बळकटी देण्यासाठी सेकंडरी स्टील उत्पादकांची भूमिका निर्णायक असल्याचे स्पष्ट केले होते. मुख्यमंत्री फडणवीस यांच्याशी झालेल्या चर्चेनंतर एआयडी अध्यक्ष आशिष काळे म्हणाले,“गडचिरोली भारतातील सर्वाधिक आशादायी स्टील उत्पादन क्षेत्र ठरू शकते. येथील समृद्ध लोखंड धातू साठे, पायाभूत सुविधांचा विस्तार आणि संतुलित विकासावर सरकारचा भर—या सर्व गोष्टी लक्षात घेता जागतिक दर्जाचे स्टील क्लस्टर उभारण्यासाठी ही योग्य वेळ आहे. मोठ्या उद्योगांसोबत एमएसएमईंनाही समप्रमाणात संधी मिळावी, यासाठी एआयडी कटिबद्ध आहे.”

उद्योग क्षेत्राचा सकारात्मक प्रतिसाद

सनविजय रोलिंग अँड इंजिनिअरिंग लिमिटेड, रामसन्स ग्रुप, दिव्यांश स्टील प्रा. लि. आणि गोयल आयर्न अँड स्टील प्रा. लि. यांसारखे अनेक सेकंडरी स्टील उत्पादक या क्लस्टरमध्ये गुंतवणुकीबाबत उत्सुक असून, स्पर्धात्मक प्रोत्साहन पॅकेज मिळाल्यास युनिट्स उभारण्यासाठी ते तयार आहेत.एआयडीचा प्रस्ताव उद्योगमंत्री उदय सामंत आणि उद्योग विभागाचे प्रधान सचिव डॉ. पी. अनबलगन यांनाही सादर करण्यात आला आहे.

प्रस्तावात पुढील महत्त्वाच्या बाबींचा समावेश आहे :

किमान 1000 हेक्टर औद्योगिक क्षेत्र टप्प्याटप्प्याने विकसित करणे

प्रि-अक्वायर्ड लँड बँक

एमएसएमई व एसएसआयसाठी परवडणाऱ्या दरात जमीन उपलब्धता

मजबूत रेल्वे–रस्ता संपर्क

अखंडित वीज व पाणीपुरवठा

स्वतंत्र पॉवर प्रोड्युसरमार्फत वाजवी दरात वीजपुरवठा

स्थानिक लोखंड धातूचा प्राधान्याने पुरवठा

कॉमन फॅसिलिटी सेंटर, आयटीआय, वेअरहाऊसिंग व लॉजिस्टिक पार्क

कॅपिटल सबसिडी, वीजदर सवलत, SGST रीइम्बर्समेंट, व्याज अनुदान, स्टँप ड्युटी माफी अशा प्रोत्साहनांची तरतूद

सर्व परवानग्यांसाठी सिंगल-विंडो प्रणाली लागू करण्याची मागणी

गडचिरोली ‘भारताचा स्टील हब’ होण्याकडे वाटचाल ?

एआयडीचा अंदाज आहे की प्रस्तावित ‘गडचिरोली स्टील हब’ विकसित झाल्यास मोठ्या प्रमाणावर रोजगारनिर्मिती होईल, राज्यात मूल्यवर्धन वाढेल आणि गडचिरोलीला “भारताचा स्टील हब” म्हणून विकसित करण्याच्या सरकारच्या दृष्टीला बळ मिळेल.

---------------------

हिंदुस्थान समाचार / Chaitanya JayantRao Chitnis