रायगड, 23 नोव्हेंबर, (हिं.स.)। श्रीवर्धनच्या सर्वांगीण विकासासाठी गेल्या पंधरा वर्षांत राष्ट्रवादी काँग्रेस पक्षाने केलेल्या कामांचा उल्लेख करत, आगामी काळात हा वेग अधिकाधिक वाढणार असल्याचे मत राष्ट्रवादी काँग्रेस पक्षाचे प्रदेशाध्यक्ष व खासदार सुनील तटकरे यांनी व्यक्त केले. श्रीवर्धन मोहल्ला येथे आयोजित पक्ष प्रवेश सोहळ्यात ते बोलत होते.

खासदार तटकरे म्हणाले, “श्रीवर्धनमध्ये पर्यटन क्षेत्रात झालेल्या सकारात्मक बदलांमुळे येथील ओळख राज्याबरोबरच राष्ट्रीय आणि आंतरराष्ट्रीय पातळीवर झळकू लागली आहे. दिवसेंदिवस वाढणारा पर्यटकांचा ओघ ही येथील प्रगतीची मोठी नांदी आहे. त्यामुळे स्थानिकांना नव्या रोजगारसंधी निर्माण झाल्या असून व्यापार, पर्यटन आणि अर्थकारणाला गती मिळत आहे.” त्यांनी या विकासप्रक्रियेत स्थानिक नागरिकांच्या सहकार्याचेही विशेष महत्त्व अधोरेखित केले.

या कार्यक्रमाला महिला व बालविकास मंत्री अदिती तटकरे, तालुका अध्यक्ष दर्शन विचारे, नगराध्यक्ष पदाचे उमेदवार जितेंद्र सातनाक, माजी आमदार तुकाराम सुर्वे तसेच राष्ट्रवादी काँग्रेसच्या विविध पदाधिकारी यांची उपस्थिती होती.

या सोहळ्यात शिवसेना (उद्धव बाळासाहेब ठाकरे) गटातील जुनेद दुस्ते, शोहेब हमदुल्ले, इरफान सोनाले, सलमान सोनाले यांच्यासह अनेक कार्यकर्त्यांनी राष्ट्रवादी काँग्रेसमध्ये प्रवेश करून पक्षाला नवी ताकद दिली. नव्या कार्यकर्त्यांच्या आगमनामुळे आगामी निवडणुकांच्या पार्श्वभूमीवर राष्ट्रवादी काँग्रेस अधिक मजबूत झाल्याचे पक्षनेत्यांनी सांगितले.

यावेळी मंत्री अदिती तटकरे यांनी गेल्या सोळा वर्षांत श्रीवर्धनमध्ये पूर्ण झालेल्या व सुरू असलेल्या पायाभूत सुविधा, जलसंधारण, पर्यटन विकास प्रकल्पांसह विविध कामांची माहिती उपस्थितांना दिली.

या पक्ष प्रवेशामुळे श्रीवर्धनच्या राजकीय वातावरणात नवचैतन्य निर्माण झाले असून आगामी निवडणुका अधिक रंगतदार होण्याची चिन्हे दिसू लागली आहेत.

---------------

हिंदुस्थान समाचार / संदेश साळुंके