मुंबई, 5 नोव्हेंबर (हिं.स.)। हुंडई मोटर इंडियानं भारतात आपल्या लोकप्रिय सब-4 मीटर एसयूव्ही वेन्यूचं दुसरं जनरेशन मॉडेल सादर केलं आहे. नवीन डिझाइन, आधुनिक इंटीरियर आणि प्रगत तंत्रज्ञानासह हे मॉडेल भारतीय बाजारात दाखल झालं आहे. 2022 मध्ये फेसलिफ्ट अपडेट मिळाल्यानंतर आता या गाडीत मोठ्या प्रमाणात बदल करण्यात आले आहेत. नवीन वेन्यूमध्ये क्रेटाप्रमाणे ड्युअल 10.25 इंच कनेक्टेड डिस्प्ले, पॅनोरॅमिक सनरूफ, व्हेंटिलेटेड फ्रंट सीट्स आणि एकूण 65 प्रगत सेफ्टी फीचर्स देण्यात आले आहेत.

तीन व्हेरियंट्समध्ये उपलब्ध असलेल्या या मॉडेलची किंमत एक्स-शोरूम 7.90 लाख रुपयांपासून सुरू होते. HX2, HX4 आणि HX5 अशा तीन व्हेरियंट्समध्ये ती मिळते, ज्यांच्या एक्स-शोरूम किंमती अनुक्रमे 7,89,900 रुपये, 8,79,900 रुपये आणि 9,14,900 रुपये आहेत. ही एसयूव्ही आता मारुति ब्रेझा, टाटा नेक्सॉन, महिंद्रा एक्सयूव्ही 3 एक्सओ, किआ सोनेट, रेनो काइगर आणि निसान मॅग्नाइट यांसारख्या प्रतिस्पर्ध्यांना थेट टक्कर देणार आहे.डिझाइनबाबत बोलायचं झालं तर 2025 वेन्यूचा लुक अधिक दमदार आणि बॉक्सी बनवण्यात आला आहे. समोर नवीन स्प्लिट एलईडी हेडलाइट्स, सी-आकाराचे डीआरएल्स आणि अल्कजारसारखा रेक्टँग्युलर ग्रिल दिला आहे, जो गाडीला प्रीमियम लुक देतो. बाजूस रुंद व्हील आर्क्स आणि आकर्षक अलॉय व्हील्स आहेत, तर मागे नवीन कनेक्टेड एलईडी टेललाइट्स गाडीला आधुनिक टच देतात.

आतल्या भागात पूर्णपणे नवीन आणि तंत्रज्ञानप्रधान केबिन आहे. क्रेटा आणि अल्कजारप्रमाणेच ड्युअल-स्क्रीन सेटअप देण्यात आला आहे, ज्यात 10.25 इंचाचं टचस्क्रीन इन्फोटेनमेंट सिस्टम आणि तितक्याच आकाराचा डिजिटल ड्रायव्हर डिस्प्ले आहे. स्क्रीनखाली एसी व्हेंट्स, मीडिया रोटरी डायल्स आणि क्लायमेट कंट्रोल बटन्स आहेत. याशिवाय, नवीन स्टीयरिंग व्हील, ऑटो-डिमिंग रिअर-व्ह्यू मिरर आणि डॅशकॅमही मिळतात.

फीचर्सच्या यादीत पॅनोरॅमिक सनरूफ, व्हेंटिलेटेड फ्रंट सीट्स, 4-वे पावर्ड ड्रायव्हर सीट, वायरलेस फोन चार्जर, रिअर व्हेंट्ससह ऑटो एसी यांसारखी उपकरणं कायम ठेवण्यात आली आहेत. सुरक्षा विभागात 6 एअरबॅग्स, टीपीएमएस, लेव्हल-2 एडीएएस सूट, फ्रंट पार्किंग सेन्सर्स आणि 360-डिग्री कॅमेरा उपलब्ध आहेत. एकूण 65 प्रगत सेफ्टी फीचर्समुळे ही एसयूव्ही आपल्या सेगमेंटमध्ये सर्वाधिक सुरक्षित ठरते.

परफॉर्मन्सच्या दृष्टीने, नवीन वेन्यूमध्ये तीन इंजिन पर्याय दिले गेले आहेत — 1.2 लिटर नॅचुरली ॲस्पायरेटेड पेट्रोल इंजिन (83 PS, 114 Nm, 5-स्पीड मॅन्युअल), 1.0 लिटर टर्बो पेट्रोल इंजिन (120 PS, 172 Nm, 6-स्पीड मॅन्युअल/7-स्पीड DCT) आणि 1.5 लिटर डिझेल इंजिन (116 PS, 250 Nm, 6-स्पीड मॅन्युअल). मायलेजनुसार हे इंजिन अनुक्रमे 17.5, 18–20 आणि 23–25 किमी प्रति लिटर देतात. शहर आणि हायवे दोन्ही ठिकाणी ही गाडी संतुलित आणि शक्तिशाली परफॉर्मन्स देऊ शकते.

हुंडई वेन्यू एन लाइन व्हेरिएंट

नव्या जनरेशनसोबतच हुंडईनं वेन्यू एन लाइन व्हेरिएंटही सादर करून सबकॉम्पॅक्ट एसयूव्ही सेगमेंटमध्ये उत्साह निर्माण केला आहे. एन लाइन व्हेरिएंटमध्ये अधिक स्पोर्टी लुक, रेड हायलाइट्ससह डार्क क्रोम ग्रिल, नवीन बॉडी किट आणि ड्युअल एक्झॉस्ट टिप्स दिल्या आहेत. आतून ऑल-ब्लॅक इंटीरियर, रेड स्टिचिंग, एन लाइन बॅजिंग, 12.3 इंच कर्व्ड ट्विन स्क्रीन आणि BOSE चे 8 स्पीकर्स या कारला प्रीमियम फिनिश देतात.

वेन्यू एन लाइनला 1.0 लिटर टर्बो GDi पेट्रोल इंजिन देण्यात आलं असून ते 120 PS पॉवर आणि 172 Nm टॉर्क निर्माण करतं. हे इंजिन 6-स्पीड मॅन्युअल आणि 7-स्पीड DCT ट्रान्समिशन पर्यायांसह उपलब्ध आहे. मॅन्युअल व्हर्जनचा मायलेज 18.74 किमी प्रति लिटर तर DCT व्हर्जनचा 20 किमी प्रति लिटर आहे.हुंडई वेन्यूच्या या दुसऱ्या जनरेशन आणि एन लाइन मॉडेल्समुळे कंपनीनं सब-4 मीटर एसयूव्ही बाजारात पुन्हा एकदा दमदार उपस्थिती नोंदवली आहे. स्टाइल, परफॉर्मन्स, सुरक्षा आणि तंत्रज्ञान यांचा उत्तम संगम साधत, ही नवी वेन्यू भारतीय ग्राहकांना आकर्षित करणार आहे.

---------------

हिंदुस्थान समाचार / Suraj Chaugule