कोल्हापूर, 5 नोव्हेंबर (हिं.स.) “राज्यातील आगामी स्थानिक स्वराज्य संस्थांच्या निवडणुकांपूर्वी महायुती पूर्णपणे एकजुट आहे”, असे मुख्यमंत्री देवेंद्र फडणवीस यांनी बुधवारी सांगितले. त्यांनी स्पष्ट केले की, जर निवडणुकीपूर्वी औपचारिक आघाडी झाली नाही, तरी निवडणुकीनंतर महायुती एकत्र येणारच आहे.

कोल्हापूरमध्ये पत्रकारांशी बोलताना फडणवीस म्हणाले, “निवडणुकीची घोषणा झाली आहे आणि आम्ही पूर्ण तयारीत आहोत. महायुतीतील सर्व नेते स्थानिक पातळीवर आघाडीबाबत निर्णय घेतील, परंतु कोणत्याही परिस्थितीत तिन्ही पक्ष भाजप, एकनाथ शिंदे यांची शिवसेना आणि अजित पवार यांची राष्ट्रवादी काँग्रेस (राकांपा) एकत्र राहतील.” पुढे फडणवीस यांनी दावा केला की, राज्यातील जनता महायुती सरकारवर पूर्ण विश्वास ठेवते आणि आगामी निवडणुकांमध्ये हे आघाडीला मोठा विजय मिळवून देईल.

महाराष्ट्र नवनिर्माण सेनेचे (मनसे) प्रमुख राज ठाकरे यांनी मतदार याद्यांमधील गोंधळाबाबत निवडणूक आयोगावर टीका केली होती. त्यावर फडणवीस म्हणाले, “सुप्रीम कोर्टाच्या आदेशानुसार निवडणुका पुढे ढकलता येत नाहीत. राज ठाकरे फक्त निवडणुका पुढे ढकलण्याची मागणी करत आहेत, पण निवडणूक आयोग सर्वोच्च न्यायालयाच्या आदेशाच्या विरोधात जाऊ शकत नाही.”

दरम्यान, राज्य निवडणूक आयुक्त दिनेश वाघमारे यांनी मंगळवारी (दि.४) जाहीर केले की महाराष्ट्रातील 246 नगरपरिषद आणि 42 नगरपंचायतींच्या निवडणुका 2 डिसेंबर रोजी घेतल्या जातील आणि मतमोजणी 3 डिसेंबरला होईल. मात्र, 29 महानगरपालिका, 32 जिल्हा परिषद आणि 336 पंचायत समित्यांच्या निवडणुकीच्या तारखा अद्याप जाहीर झालेल्या नाहीत.

---------------

हिंदुस्थान समाचार / Priyanka Bansode