इस्लामाबाद, 9 नोव्हेंबर, (हिं.स.) टी२० मालिकेनंतर पाकिस्तानने एकदिवसीय मालिकेत दक्षिण आफ्रिकेला पराभूत केले. फैसलाबाद येथे झालेल्या तिसऱ्या सामन्यात यजमान संघाने ७ विकेट्सने विजय मिळवला. इक्बाल स्टेडियमवर प्रथम फलंदाजी करताना पाहुणा संघ १४३ धावांवर सर्वबाद झाला. पाकिस्तानने २५.१ षटकांत केवळ ३ विकेट्स गमावून हे लक्ष्य पार केले.

सलामीवीर सैम अयुबने अर्धशतक झळकावून संघाला विजय मिळवून दिला. पण माजी कर्णधार बाबर आझम पुन्हा एकदा अपयशी ठरला. तो २७ धावांवर धावबाद झाला. त्याने ८२ डावांमध्ये त्याचे शेवटचे आंतरराष्ट्रीय शतक झळकावले होते.

दक्षिण आफ्रिकेने नाणेफेक जिंकून फलंदाजी करण्याचा निर्णय घेतला. लुहान ड्रे प्रिटोरियस आणि यष्टिरक्षक क्विंटन डी कॉक यांनी संघाला दमदार सुरुवात दिली. दोघांनी ७२ धावांची सलामी भागीदारी केली. प्रिटोरियस ३९ धावांवर बाद झाला आणि तिथून संघाने शेवटच्या ९ विकेट्स गमावून ७१ धावा केल्या.

क्विंटन डी कॉकने अर्धशतक झळकावून संघाला १०० धावांच्या पुढे नेले. तो ५३ धावांवर बाद झाला. त्याच्या पाठोपाठ टोनी डी जॉर्गी (२), कर्णधार मॅथ्यू ब्रेटजी (१६), रुबिन हरमन (१), डोनोव्हन फरेरा (७), यॉर्न फॉर्च्यून (४), काबायोम्झी पीटर्स (१६) आणि नांद्रे बर्गर (३) यांचा समावेश होता. लुंगी एनगिडी आणि कॉर्बिन बॉश यांना त्यांचे खातेही उघडता आले नाही.

दक्षिण आफ्रिकेचा संघ ३७.५ षटकांत १४३ धावांवर बाद झाला. संघातील 7 क्रिकेटपटू १० धावांचा टप्पाही गाठू शकले नाहीत. पाकिस्तानकडून फिरकी गोलंदाज अबरार अहमदने २७ धावांत ४ विकेट्स घेतल्या. सलमान आघा, मोहम्मद नवाज आणि कर्णधार शाहीन आफ्रिदी यांनी प्रत्येकी २ विकेट्स घेतल्या.

१४४ धावांच्या लक्ष्याचा पाठलाग करताना पाकिस्तानने पहिल्याच षटकात सलामीवीर फखर झमानला गमावले होते. तो आपले खाते उघडू शकला नाही. तिसऱ्या क्रमांकावर फलंदाजी करताना बाबर आझमने अयुबसह संघाला सावरले. बाबर २७ धावांवर धावबाद झाला आणि संघाने ६५ धावांवर दुसरी विकेट गमावली.

त्यानंतर यष्टीरक्षक मोहम्मद रिझवानने अयुबसह संघाला १०० धावांच्या पुढे नेले. अयुब ७७ धावांवर बाद झाला. त्यानंतर सलमान आघा आणि रिझवान यांनी २६ व्या षटकात ७ विकेट्सने संघाला विजय मिळवून दिला. रिझवान ३२ आणि आघा ५ धावांवर नाबाद राहिले. दक्षिण आफ्रिकेकडून योर्न फॉर्च्यून आणि नांद्रे बर्गर यांनी प्रत्येकी १ विकेट घेतली.

पाकिस्तान आणि दक्षिण आफ्रिका यांच्यातील कसोटी मालिका १-१ अशी बरोबरीत सुटली होती. पाकिस्तानने टी-२० मालिका २-१ अशी जिंकली. आणि आता एकदिवसीय मालिकाही २-१ ने जिंकली. दक्षिण आफ्रिकेने दुसरा एकदिवसीय सामना जिंकला होता. तर पाकिस्तानने मालिकेतील उर्वरित सामने जिंकले.

---------------

हिंदुस्थान समाचार / वृषाली देशपांडे