रायगड, 14 डिसेंबर (हिं.स.)
सर्वसामान्य नागरिकांना परवडणारी घरे उपलब्ध व्हावीत यासाठी सातत्याने आणि ठामपणे पाठपुरावा करणाऱ्या आमदार विक्रांत पाटील यांच्या प्रयत्नांना अखेर यश आले आहे. सिडकोकडून उभारण्यात येणाऱ्या LIG (कमी उत्पन्न गट) आणि EWS (आर्थिकदृष्ट्या दुर्बल घटक) प्रवर्गातील घरांच्या किमतींमध्ये १० टक्के दरकपात करण्याचा महत्वपूर्ण निर्णय महायुती सरकारने सभागृहात जाहीर केला.
सिडकोच्या घरांच्या वाढलेल्या किमतींमुळे गोर-गरीब व मध्यमवर्गीय नागरिकांचे घराचे स्वप्न दूरावत असल्याची भावना अनेक लॉटरी धारकांनी आमदार विक्रांत पाटील यांच्याकडे व्यक्त केली होती. हजारो नागरिकांच्या या अपेक्षांचा विचार करत आमदार पाटील यांनी हिवाळी अधिवेशनात ठाम भूमिका घेत शासनाचे लक्ष वेधले. अवास्तव दरांमुळे सामान्य नागरिक घरापासून वंचित राहत असल्याचा मुद्दा त्यांनी प्रभावीपणे मांडत दरकपातीची मागणी सातत्याने लावून धरली होती.
त्यांच्या या लढाऊ पाठपुराव्याला सकारात्मक प्रतिसाद देत उपमुख्यमंत्री एकनाथ शिंदे यांनी सिडकोच्या LIG व EWS घरांच्या दरांमध्ये १० टक्के कपात करण्याचा निर्णय जाहीर केला. ‘हाऊसिंग फॉर ऑल’ या केंद्र व राज्य शासनाच्या महत्त्वाकांक्षी धोरणाला यामुळे अधिक बळ मिळणार असून, सर्वसामान्य कुटुंबांचे स्वतःच्या घराचे स्वप्न साकार होण्यास मोठी मदत होणार आहे.
या निर्णयामुळे नवी मुंबई, पनवेल आणि परिसरातील हजारो लाभार्थ्यांना दिलासा मिळणार असून सिडकोच्या घरांसाठीची मागणी वाढण्याची शक्यता व्यक्त होत आहे. या निर्णयाबद्दल आमदार विक्रांत पाटील यांनी उपमुख्यमंत्री एकनाथ शिंदे यांचे आभार मानत, “सर्वसामान्य माणसाच्या घराचे स्वप्न पूर्ण करण्याच्या दिशेने हा निर्णय मैलाचा दगड ठरेल,” अशी प्रतिक्रिया दिली.
दरकपातीच्या या निर्णयाचे नागरिकांनी स्वागत केले असून, लॉटरी धारकांनी आमदार विक्रांत पाटील यांच्या लढ्याबद्दल त्यांचे अभिनंदन करत मनापासून आभार मानले आहेत.
---------------
हिंदुस्थान समाचार / संदेश साळुंके
