नवी दिल्ली, 17 डिसेंबर (हिं.स.)।बांगलादेशची राजधानी ढाका येथे सध्याची सुरक्षा परिस्थिती लक्षात घेऊन भारताने बुधवारी आपले भारतीय व्हिसा अर्ज केंद्र (आयव्हीएसी) तात्पुरते बंद केले आहे. हे केंद्र ढाक्यातील जमुना फ्युचर पार्क येथे स्थित असून, राजधानीतील सर्व भारतीय व्हिसा सेवांसाठीचे मुख्य आणि एकात्मिक केंद्र मानले जाते.

आयव्हीएसी कडून जारी करण्यात आलेल्या निवेदनात सांगण्यात आले की, सुरक्षा परिस्थितीचा विचार करून बुधवारी दुपारी 2 वाजल्यानंतर केंद्र बंद करण्यात आले. तसेच, ज्यांची आज अर्ज सादर करण्यासाठी मुलाखत होती, त्यांची तारीख पुढील काळासाठी पुनर्नियोजित करण्यात येईल, असेही स्पष्ट करण्यात आले आहे.

याआधी नवी दिल्लीत परराष्ट्र मंत्रालयाने बांगलादेशचे उच्चायुक्त रियाझ हमीदुल्ला यांना बोलावले होते. ढाक्यामधील भारतीय मिशनच्या आसपास काही कट्टरपंथी घटकांकडून सुरक्षा वातावरण बिघडवण्याच्या कथित योजनांबाबत मंत्रालयाने तीव्र चिंता व्यक्त केली. परराष्ट्र मंत्रालयाने सांगितले की बांगलादेशची अंतरिम सरकार आपल्या राजनयिक जबाबदाऱ्यांनुसार तेथील भारतीय मिशन आणि कार्यालयांची सुरक्षा सुनिश्चित करेल, अशी भारताला अपेक्षा आहे.

यासोबतच, बांगलादेशमध्ये ढासळत चाललेल्या सुरक्षा परिस्थितीबाबत भारताच्या गंभीर चिंतेची माहितीही उच्चायुक्तांना देण्यात आली. प्रादेशिक सुरक्षा आणि राजनयिक संस्थांच्या संरक्षणाबाबत संवेदनशीलता वाढत असलेल्या काळात हा निर्णय घेण्यात आला आहे. भारताने स्पष्ट संकेत दिले आहेत की आपल्या नागरिकांची तसेच परदेशातील भारतीय मिशनची सुरक्षा ही त्याची सर्वोच्च प्राथमिकता आहे.

नवी दिल्लीने आपले काही कर्मचारी मागे घेतल्यानंतर काही तासांतच, बांगलादेशच्या अंतरिम सरकारचे नियुक्त प्रमुख मोहम्मद युनूस यांनी सर्वांना शांत राहण्याचे आणि सर्व प्रकारच्या हिंसाचारापासून दूर राहण्याचे आवाहन केले होते.

---------------

हिंदुस्थान समाचार / Priyanka Bansode