अमरावती, 27 डिसेंबर (हिं.स.)

दर्यापूर–अंजनगाव विधानसभा मतदारसंघाच्या राजकारणात मोठी हालचाल पाहायला मिळाली. उद्धव ठाकरे गटाचे आमदार गजानन लवटे यांनी भारतीय जनता पार्टीचे राज्यसभा खासदार डॉ. अनिल बोन्डे यांची त्यांच्या अमरावती येथील निवासस्थानी जाऊन भेट घेतली. या अचानक झालेल्या भेटीमुळे राजकीय वर्तुळात चर्चांना उधाण आले आहे.

महानगरपालिका व जिल्हा परिषद निवडणुका तोंडावर असताना झालेली ही भेट अनेक राजकीय संकेत देणारी मानली जात आहे.या भेटीमुळे उद्धव गटातील कार्यकर्त्यांमध्ये संभ्रमाचे वातावरण निर्माण झाले असून, आगामी काळात स्थानिक राजकारणात मोठे बदल घडण्याची शक्यता वर्तवली जात आहे.दरम्यान, या भेटीबाबत अधिकृत प्रतिक्रिया मात्र दोन्ही बाजूंकडून देण्यात आलेली नाही.

---------------

हिंदुस्थान समाचार / अरुण जोशी