रत्नागिरी, 4 डिसेंबर, (हिं. स.) : लातूर येथे होणाऱ्या राज्यस्तरीय तायक्वांदो स्पर्धेसाठी रत्नागिरीतील ईगल तायक्वांदो अकॅडमीच्या प्रशिक्षिका संकेता संदेश सावंत यांची पंच म्हणून निवड करण्यात आली आहे.

महाराष्ट्र तायक्वांदो असोसिएशनच्या मान्यतेने तायक्वांदो असोसिएशन ऑफ लातूर आयोजित ३५ वी महाराष्ट्र स्टेट सिनिअर क्योरोगी तायक्वांदो चॅम्पियनशिप आणि ११ वी महाराष्ट्र स्टेट सिनिअर पुमसे तायक्वांदो चॅम्पियनशिप स्पर्धा ५ ते ७ डिसेंबर रोजी लातूर येथील जिल्हा क्रीडा संकुलात घेण्यात येणार आहे. या स्पर्धेसाठी संकेता संदेश सावंत यांची पंच म्हणून निवड करण्यात आली आहे.

रत्नागिरीतील अभ्युदय नगर येथील नगर परिषद बहुउद्देशीय सभागृहात चालणाऱ्या ईगल तायक्वांदो अॅकॅडमीमध्ये संकेता सावंत यांच्या मार्गदर्शनाखाली मुले या खेळाचे प्रशिक्षण घेत असून स्पर्धेमध्ये सुयश मिळवत आहेत.

राज्य स्पर्धेसाठी पंच म्हणून निवड झाल्याबद्दल राज्य संघटनेचे कोषाध्यक्ष आणि जिल्हा संघटनेचे अध्यक्ष व्यंकटेश्वरराव कर्रा, रत्नागिरी तायक्वांदो स्पोर्ट्स असोसिएशनचे जिल्हा उपाध्यक्ष विश्वदास लोखंडे, सचिव लक्ष्मण कररा, कोषाध्यक्ष शशांक घडशी, तसंच ईगल तायक्वांदो अॅकॅडमीचा पालक यांच्याकडून संकेता संदेश सावंत यांचे अभिनंदन करण्यात येत आहे.

---------------

हिंदुस्थान समाचार / रत्नागिरी