अमरावती, 5 डिसेंबर (हिं.स.)

बनावट गुंतवणूक फर्म चालवणाऱ्या पाच जणांनी संगनमत करत कट रचून अमरावती येथील प्राध्यापकाची एक कोटी रुपयांनी फसवणूक केल्याचा प्रकार गुरुवारी समोर आला. फसवणूक करणाऱ्या या पाच जणांपैकी एकाला सदर पोलिसांनी अटक केली. फसवणूकीतला सूत्रधार छत्तीसगडमधील रायपूर येथील रहिवासी असल्याची माहिती आहे.

विजय केशवराव टोपे (५२) रा. संतकृपा निवास, अंबापेठ, अमरावती असे एक कोटी रुपयांची फसवणूक झालेल्या प्राध्यापकांचे नाव आहे. गुंतवणूकीवर १५ दिवसांत ४० टक्के नफा कमावून देतो, असे आमिष दाखवत टोपे यांना प्रशांत नायडू (५०) रा. कामठी, महेश वरघडे (४५) रा. मानेवाडे, संतोष सातपुते रा. बुलडाणा, विजय बघेल रा. रायपूर यांनी गुंतवणूक करण्यात भाग पाडले. यातील बुलडाणा जिल्ह्यातील रहिवासी संतोष हा एका समविचारी मित्रांमार्फत टोपे यांच्या संपर्कात आला होता. गुंतवणूक केली तर अल्पावधीत ४० टक्क्यांपर्यंत नफा कमावता येतो, असे आमिष दाखवत संतोषने टोपे यांची नागपुरात अन्य पाच जणांची ओळख करून दिली. त्यावर विश्वास बसल्याने टोपे यांनी काही जणांना ही योजना समजावून सांगत आठ मित्रांनी मिळून या पाच जणांकडे १ कोटी रुपये गुंतवले. टोपे यांनी नागपुरातील एका खासगी गुंतवणूक कंपनीच्या कार्यालयात ही रक्कम ठकबाजांकडे दिली. त्यावर १५ दिवसांत १ कोटी ४० लाखांचा परतावा देऊन हे पाचही जण बेपत्ता झाले.

फसवणूक झाल्याचे लक्षात आल्यानंतर टोपे यांनी सदर पोलिसांत तक्रार केली. त्यावरून गुन्हा दाखल करत पोलिसांनी संतोष सातपुते याला अटक केली. रायपूर येथील रहिवासी विजय बघेल हा या बनावट गुंतवणूक कंपनीचा सूत्रधार असून पोलीस त्याच्या अटकेसाठी छत्तीसगड पोलिसांशी संपर्कात आहेत.

---------------

हिंदुस्थान समाचार / अरुण जोशी