सोलापूर, 27 सप्टेंबर, (हिं.स.)। उजनी व वीर धरणातून भीमा नदीत 48 हजार क्युसेकचा विसर्ग करण्यात येत आहे. यामुळे पंढरपूर येथे 50 हजार क्युसेकचा विसर्ग सुरू आहे. यामुळे कोल्हापूर पद्धतीचे 8 बंधारे पाण्याखाली गेले आहेत. तर चंद्रभागेतील पुंडलिक मंदिरासह इतर मंदिरांना पाण्याने दिलेला वेढा कायम आहे. त्यामुळे पंढरपूर येथे नदीच्या घाटांना पाणी लागलेले आहे.

उजनी धरणातून सकाळी 10 वाजता 40 हजार तर वीर धरणातून 8 हजार क्युसेकचा विसर्ग करण्यात आला आहे. यामुळे भीमा (चंद्रभागा) नदीला पुन्हा पूरसद़ृश स्थिती निर्माण झाली आहे. या पाण्याने पंढरपूर येथील चंद्रभागेतील पुंडलिक मंदिरासह इतर मंदिरांना पाण्याने वेढा दिला आहे. तर जुना दगडी पूल पाण्याखाली गेला आहे. तसेच भीमा नदीवरील कोल्हापूर पध्दतीचे पंढरपूर, विष्णूपद, मुंढेवाडी, गुरसाळे, कौठाळी, पिराची कुरोली, पुळूज, आव्हे हे आठ बंधारे पाण्याखाली गेले आहेत. त्यामुळे या बंधार्‍यांवरुन होणारी वाहतूक बंद करण्यात आलेली आहे. याबाबत प्रशासनाकडून नदीकाठच्या लोकांना सतर्कतेच्या सूचना देण्यात आल्या आहेत.

---------------

हिंदुस्थान समाचार / यशपाल गायकवाड