वडोदरा, 10 जानेवारी (हिं.स.)भारतीय क्रिकेट संघ २०२६ ची सुरुवात न्यूझीलंडविरुद्धच्या एकदिवसीय मालिकेने करणार आहे. भारत आणि न्यूझीलंड यांच्यातील पहिला एकदिवसीय सामना रविवारी वडोदरा येथे खेळला जाईल. हे वर्ष भारतासाठी खूप व्यस्त आहे, पुढील महिन्यात टी-२० विश्वचषक होणार आहे. न्यूझीलंडविरुद्धची ही मर्यादित षटकांची मालिका महत्त्वाची आहे. भारताचा कसोटी आणि एकदिवसीय कर्णधार शुभमन गिल दुखापतीनंतर मैदानात परतणार आहे. गिल काही काळापासून फॉर्ममध्ये नाही आणि या मालिकेमुळे त्याला पुन्हा फॉर्म मिळवण्याची संधी मिळेल.

रोहित शर्मा आणि विराट कोहलीसारखे स्टार क्रिकेटपटू न्यूझीलंडविरुद्धच्या एकदिवसीय मालिकेसाठी संघात आहेत. रोहित आणि कोहली यापूर्वी दक्षिण आफ्रिकेविरुद्धच्या एकदिवसीय मालिकेत खेळले होते. कोहली उत्कृष्ट फॉर्ममध्ये होता आणि भारताच्या विजयात त्यांनी महत्त्वाची भूमिका बजावली होती. आता रो-को जोडी पुन्हा एकदा प्रेक्षकांचे मनोरंजन करण्याच्या उद्देशानेच मैदानात उतरण्यासाठी प्रयत्नशील असणार आहे. न्यूझीलंडविरुद्धच्या मालिकेपूर्वी रोहित आणि कोहली विजय हजारे ट्रॉफीमध्येही दोन सामने खेळले होते.

कर्णधार शुभमन गिलता फॉर्म भारतासाठी आधीच चिंतेचा विषय आहे आणि गेल्या वर्षीच्या अखेरीस त्याला दुखापतीमुळे दक्षिण आफ्रिकेविरुद्धच्या एकदिवसीय मालिकेतून बाहेर पडावे लागले. गिलच्या पुनरागमनामुळे यशस्वी जयस्वालला संघात स्थान मिळण्याची शक्यता कमीच आहे. दक्षिण आफ्रिकेविरुद्धच्या शेवटच्या सामन्यात यशस्वीने त्याचे पहिले एकदिवसीय शतक झळकावले होते.

या मालिकेत श्रेयस अय्यरचे भारतीय संघात पुनरागमन होईल. गेल्या ऑक्टोबरमध्ये ऑस्ट्रेलिया दौऱ्यादरम्यान श्रेयसला दुखापत झाली होती. एकदिवसीय मालिकेसाठी संघ जाहीर करताना, भारतीय क्रिकेट नियामक मंडळाने (बीसीसीआय) स्पष्ट केले की, श्रेयसचा सहभाग त्याच्या तंदुरुस्तीवर अवलंबून असेल. श्रेयसने अलीकडेच विजय हजारे ट्रॉफीमध्ये मुंबई संघाचे नेतृत्व केले आणि भारतीय क्रिकेट नियामक मंडळाकडून (बीसीसीआय) फिटनेस प्रमाणपत्र मिळाले. यामुळे त्याला न्यूझीलंडविरुद्ध खेळण्याचा मार्गही मोकळा झाला. श्रेयस अय्यरच्या पुनरागमनामुळे फलंदाजी क्रमवारीत सुरू असलेल्या प्रयोगांना पूर्णविराम मिळण्याची अपेक्षा आहे आणि ३१ वर्षीय क्रिकेटपटू पुन्हा एकदा चौथ्या क्रमांकावर फलंदाजी करेल हे जवळजवळ निश्चित आहे.

ऋषभ पंतच्या एकदिवसीय संघात समावेशाबाबत बरीच चर्चा झाली होती. पण हे स्पष्ट आहे की, केएल राहुल हा प्लेइंग इलेव्हनमध्ये पहिल्या पसंतीचा यष्टीरक्षक असेल. केएल राहुलने खालच्या फळीचा फलंदाज आणि यष्टीरक्षक म्हणून खेळणे सुरू ठेवल्याने, ऋषभ पंतचा प्लेइंग इलेव्हनमध्ये समावेश होण्याची शक्यता कमी आहे. दरम्यान, अनुभवी अष्टपैलू रवींद्र जडेजाने जोरदार सराव केला आणि त्याची उपलब्धता दर्शविली.

टी-२० च्या प्रतिबद्धतेमुळे जसप्रीत बुमराह आणि हार्दिक पंड्या यांना एकदिवसीय मालिकेतून विश्रांती देण्यात आली आहे. वेगवान गोलंदाजी मुख्यत्वे मोहम्मद सिराज, अर्शदीप सिंग, हर्षित राणा आणि प्रसिद्ध कृष्णा यांच्यावर अवलंबून असेल. कुलदीप यादव, वॉशिंग्टन सुंदर आणि जडेजा फिरकी विभाग सांभाळतील. संध्याकाळी दव आणि सपाट खेळपट्ट्या पाहता, या फॉरमॅटमध्ये आक्रमक विकेट घेण्याऐवजी धावा मर्यादित करण्यावर अधिक लक्ष केंद्रित केले जाईल. दरम्यान, वॉशिंग्टन सुंदरचा प्लेइंग इलेव्हनमध्ये ऑलराउंडर म्हणून समावेश केला जाण्याची अपेक्षा आहे.

---------------

हिंदुस्थान समाचार / वृषाली देशपांडे