क्वालालम्पूर, १० जानेवारी (हिं.स.) मलेशिया ओपन सुपर १००० बॅडमिंटन स्पर्धेच्या महिला एकेरीच्या उपांत्य फेरीत पी. व्ही सिंधूचे आव्हान संपुष्टात आले. हंगामातील पहिल्या स्पर्धेत सिंधूला चीनच्या जागतिक क्रमवारीत दुसऱ्या क्रमांकाच्या वांग शीयीकडून १६-२१, १५-२१ असा सरळ गेममध्ये पराभव पत्करावा लागला.
दोन वेळा ऑलिंपिक पदक विजेती सिंधू या सामन्यात दबाव सहन करू शकली नाही आणि सामन्यादरम्यान तिने अनेक अनपेक्षित चुका केल्या. गेल्या वर्षी ऑक्टोबरनंतर ती पहिल्यांदाच स्पर्धेत खेळत असल्याने हा सामना तिच्यासाठी खास होता. पायाच्या दुखापतीतून बरे होऊन परतणाऱ्या सिंधूने दुसऱ्या गेममध्ये ११-६ अशी आघाडी घेतली.या पराभवासह भारताचे स्पर्धेतील आव्हानही संपुष्टात आले आहे.
सामन्याच्या सुरुवातीला सिंधूने जोरदार झुंज दिली. तिने शक्तिशाली स्मॅश मारले. सिंधूने वांगच्या काही चुकांचा फायदा घेत ९-७ अशी आघाडी घेतली. पण मध्यांतरापर्यंत, चिनी बॅडमिंटनपटूने पुनरागमन केले आणि एक गुणाची आघाडी घेतली. या काळात सिंधू नेटवर अडखळत असल्याचे दिसून आले.
ब्रेकनंतर, दोन्ही बॅडमिंटनपटूंना त्यांच्या शॉट्सची लांबी तपासण्यात अडचण आली आणि स्कोअर १३-१३ असा बरोबरीत राहिला. १५-१४ अशी आघाडी घेत, वांगने नंतर अधिकाधिक आक्रमक शॉट्स खेळले. ज्यामुळे सिंधूवर दबाव आला. वांगने अचूक लिफ्टसह स्कोअर १८-१४ पर्यंत वाढवला आणि अखेर पहिला गेम जिंकला.
दुसऱ्या गेमच्या सुरुवातीला, सिंधूने दोन अनफोर्स्ड चुका केले आणि १-३ ने मागे पडली होती. पण ती लवकरच सावरली आणि उत्कृष्ट रॅलीसह ६-३ अशी आघाडी घेतली. वांगने अंतर कमी केले. पण सिंधूने कोर्टच्या कोपऱ्यात तीक्ष्ण, कोन असलेले शॉट्स खेळले आणि ब्रेकच्या वेळी ११-६ अशी आघाडी घेतली.
ब्रेकनंतर वांगने आक्रमक पवित्रा स्वीकारला. सिंधूने काही शानदार नेट शॉट्ससह १३-९ अशी आघाडी कायम ठेवली. त्यानंतर, सिंधूने आणखी काही चुका केल्या ज्यामुळे वांगने सामना १३-१३ असा बरोबरीत आणला.
वांगने १६-१३ अशी आघाडी घेतली. त्यानंतर सिंधूने बॅकलाइनच्या बाहेर दोन शॉट्स मारले आणि बॅकहँड नेट एररमुळे वांगला पाच मॅच पॉइंट मिळाले. शेवटी, सिंधूचा आणखी एक शॉट बाहेर गेला, ज्यामुळे वांग सामना जिंकून अंतिम फेरीत पोहोचली.
हिंदुस्थान समाचार / वृषाली देशपांडे
