पिंपरी, 08 जानेवारी (हिं.स.)भाजप, दोन्ही राष्ट्रवादी काँग्रेस, शिवसेना (शिंदे), महाराष्ट्र नवनिर्माण सेना, रिपब्लिकन पार्टी ऑफ इंडिया (आठवले गट) आणि आम आदमी पार्टी असे सात पक्षांचे शहराध्यक्ष पिंपरी-चिंचवड महापालिका निवडणूक मैदानात उतरले आहेत. त्यांपैकी कोणता शहराध्यक्ष महापालिका सभागृहात जाणार हे पाहणे औत्सुक्याचे ठरणार आहे.पिंपरी-चिंचवड महापालिकेच्या यंदाच्या निवडणुकीत विविध सात राजकीय पक्षांचे शहराध्यक्ष स्वत: उमेदवार आहेत. त्यांपैकी तीन पक्षांचे शहराध्यक्ष पहिल्यांदाच आपले नशीब आजमावत आहेत.

पिंपळे सौदागर प्रभाग क्रमांक २८ मध्ये भाजपचे शहराध्यक्ष, माजी नगरसेवक शत्रुघ्न काटे हे उमेदवार आहेत. वल्लभनगर, कासारवाडी, पिंपरी प्रभाग क्रमांक ९ मधून राष्ट्रवादी काँग्रेस (अजित पवार) पक्षाचे शहराध्यक्ष योगेश बहल पुन्हा निवडणूक आखाड्यात आहेत. ते माजी महापौर असून त्यांनी सत्तारूढ पक्षनेते, विरोधी पक्षनेतेपदही भूषवले आहे. ते सातव्यांदा निवडणूक लढवत आहेत.राष्ट्रवादी काँग्रेस (शरद पवार) पक्षाचे शहराध्यक्ष तुषार कामठे पिंपळे निलख, कस्पटेवस्ती, वाकड प्रभाग क्रमांक २६ मधून लढत आहेत. तेही माजी नगरसेवक असून दुसऱ्यांदा निवडणूक लढवत आहेत. ते मागीलवेळी भाजपकडून निवडून आले होते. निगडी, यमुनानगर प्रभाग क्रमांक १३ मधून मनसेचे शहराध्यक्ष सचिन चिखले दुसऱ्यांदा लढत आहेत. मागीलवेळी ते पहिल्यांदा निवडून आले होते. शिवसेनेचे (शिंदे) शहरप्रमुख नीलेश तरस हे रावेत, किवळे, मामुर्डी प्रभाग क्रमांक १६ येथून पहिल्यांदाच निवडणूक रिंगणात उतरले आहेत.

---------------

हिंदुस्थान समाचार / भूषण राजगुरु