इस्लामाबाद , 16 मार्च (हिं.स.)।अमेरिका–इस्रायल–इराण यांच्यात सुरू असलेला युद्धसदृश संघर्ष आता संपूर्ण मध्य- पूर्वेमध्ये पसरला असून हॉर्मुज सामुद्रधुनीवर नाकेबंदी करण्यात आली आहे. यामुळे जगभरात तेल आणि गॅसच्या पुरवठ्यात मोठी घट झाली आहे. दरम्यान, सध्या पवित्र रमजान महिना सुरू असून काही दिवसांत ईदही येणार आहे. अशा परिस्थितीत पाकिस्तानमधील कराची शहराला भीषण गॅस संकटाचा सामना करावा लागत आहे.

शहरातील 70 टक्क्यांहून अधिक भागांमध्ये गॅस पुरवठा ठप्प झाला आहे. त्यामुळे रोजा ठेवणाऱ्या लोकांना सहरी आणि इफ्तारसाठी जेवण तयार करताना मोठ्या अडचणींचा सामना करावा लागत आहे. अहवालानुसार, गॅसच्या कमतरतेमुळे संपूर्ण शहरात तीव्र नाराजीचे वातावरण निर्माण झाले आहे, कारण कुटुंबांना आपल्या दैनंदिन दिनचर्येचे नियोजन करणे कठीण झाले आहे.

आयातीत अडथळे निर्माण झाल्यामुळे कराचीची आधीच ताणाखाली असलेली गॅस वितरण व्यवस्था आणखी दबावाखाली आली आहे. परिणामी अनेक भागांमध्ये गॅसचा पुरवठा कमी झाला असून तो अत्यंत अनियमित झाला आहे. सुई सदर्न गॅस कंपनी (एसएसजीसी) ने नागरिकांना कोणतीही अधिकृत माहिती न देता शांतपणे गॅस पुरवठ्याचे नवे वेळापत्रक लागू केले आहे.माहितीनुसार, गॅस पुरवठा फक्त मर्यादित वेळेसाठीच केला जात आहे — सकाळी सुमारे 3.30 ते 6 वाजेपर्यंत सहरीसाठी आणि दुपारी 3.30 ते सायंकाळी 7 वाजेपर्यंत इफ्तारपूर्वी. मात्र स्थानिक रहिवाशांचे म्हणणे आहे की या मर्यादित वेळेतही गॅसचा दाब इतका कमी असतो की स्वयंपाकासारखी मूलभूत कामे करणेही खूप कठीण होते.

कराचीतील क्लिफ्टन, डिफेन्स हाऊसिंग अथॉरिटी, नॉर्थ कराची, फेडरल बी एरिया, गुलबर्ग आणि ओरंगी टाउन यांसह अनेक भाग सर्वाधिक प्रभावित झाले आहेत. अहवालानुसार, या भागांतील नागरिकांनी सांगितले की मागील काही दिवसांपासून गॅसचा पुरवठा अत्यंत अनियमित आहे. अनेकदा तो खूप कमी दाबाने आणि अत्यल्प वेळेसाठीच उपलब्ध होतो.या कमतरतेमुळे अनेक कुटुंबांना एलपीजी सिलिंडर किंवा वीजवर चालणारी स्वयंपाकाची उपकरणे यांसारखे महागडे पर्याय वापरण्याची वेळ आली आहे. त्यामुळे आधीच महागाई आणि रमजानमधील वाढीव खर्चामुळे त्रस्त असलेल्या नागरिकांवर अतिरिक्त आर्थिक बोजा पडत आहे.

तसेच, अधिकाऱ्यांनी गॅस पुरवठ्याचे बदललेले वेळापत्रक जाहीर न केल्यामुळेही अनेक नागरिकांनी नाराजी व्यक्त केली आहे. पारदर्शकतेचा अभाव असल्यामुळे आपल्या दैनंदिन कामांचे नियोजन करणे अशक्य झाल्याची तक्रार नागरिकांनी केली आहे.

---------------

हिंदुस्थान समाचार / Priyanka Bansode