नांदेड, 18 मार्च (हिं.स.)।

मराठवाड्यातील प्रवाशांची होणारी गैरसोय लक्षात घेऊन नांदेड ते पुणे एक्सप्रेस हडपसर स्थानकाऐवजी पूर्वीप्रमाणेच पुणे रेल्वेस्थानकापर्यंत सोडावी, अशी मागणी खा. रवींद्र चव्हाण यांनी रेल्वेमंत्री अश्विनी वैष्णव यांच्याकडे एका निवेदनाद्वारे केली आहे.

हुजूर साहिब नांदेड ते पुणे एक्सप्रेसला (गाडी क्र. १७६३०) पुणे स्थानकाऐवजी हडपसर स्थानकापर्यंत मर्यादित ठेवल्यामुळे निर्माण होणाऱ्या गंभीर प्रश्नाकडे खा. रवींद्र चव्हाण यांनी रेल्वेमंत्री अश्विनी वैष्णव यांचे लक्ष वेधले. हुजूर साहिब नांदेड पुणे एक्सप्रेस पुणे स्थानकाऐवजी हडपसर स्थानकापर्यंत मर्यादित करण्यात आली आहे. या निर्णयामुळे नांदेड आणि मराठवाडा भागातून दररोज पुण्याला प्रवास

करणाऱ्या हजारो प्रवाशांची मोठी गैरसोय होत आहे. ही रेल्वे पहाटे साडेचार वाजता हडपसर स्टेशनवर पोहोचते, परंतु त्या वेळी पीएमपीएल बस सेवा किंवा इतर सार्वजनिक वाहतूक उपलब्ध नसते. परिणामी, प्रवाशांना महागड्या रिक्षा किंवा खासगी वाहनांवर अवलंबून राहावे लागते, ज्यामुळे अनावश्यक आर्थिक भार पडतो. वैद्यकीय उपचारांसाठी पुण्याला प्रवास करणाऱ्या महिला, ज्येष्ठ नागरिक, विद्यार्थी, मजूर आणि रुग्णांच्या सुरक्षिततेबाबत आणि सोयीबाबत गंभीर चिंता व्यक्त केली जात आहे. मराठवाडा प्रदेश आधीच शैक्षणिक आर्थिक आणि आरोग्यविषयक सुविधांच्या कमतरतेने ग्रस्त आहे. अशा परिस्थितीत, या प्रदेशासाठी अत्यंत आवश्यक असलेली नांदेड ते पुणे रेल्वे सेवा पुणे स्थानकापर्यंत न वाढवणे हा जनभावनेच्या विरोधातला निर्णय मानला जात आहे. परिणामी, या रेल्वेला मिळणारा प्रवाशांचा प्रतिसादही कमी होत आहे. ही बाब लक्षात घेऊन नांदेड ते पुणे एक्सप्रेसला पूर्वीप्रमाणे तत्काळ पुणे स्थानकापर्यंत धावण्याचे आदेश देण्यात यावेत आणि मराठवाडा आणि महाराष्ट्रातील लाखो प्रवाशांना मोठा दिलासा द्यावा, अशी मागणी खा. रवींद्र चव्हाण यांनी निवेदनात केली आहे.

---------------

हिंदुस्थान समाचार / Sangita Hanumant Rao Chitanis