नवी दिल्ली, 18 मार्च, (हिं.स.) - कुस्तीपटू मिनाक्षी गोयतने अंतिम पंघालचा पराभव करून धक्कादायक निकालाची नोंद केली. पुढील महिन्यात होणाऱ्या आशियाई चॅम्पियनशिपसाठी भारतीय महिला संघात आपले स्थान पक्के केले. दोन वेळा विश्व चॅम्पियनशिप पदक विजेत्या अंतिम पांघलला पराभवाला सामोरे जावे लागले. यापूर्वी चाचणी सामन्यांमध्ये अंतिमकडून तीन वेळा पराभूत झालेल्या मिनाक्षीने यावेळी भक्कम बचावात्मक खेळ दाखवत ६-२ अशी आघाडी घेतली आणि तिला चितपट करून विजय मिळवला.

आशियाई क्रीडा स्पर्धेतील कांस्यपदक विजेती अंतिम, जिने अनुभवी विनेश फोगाटने स्पर्धेतून माघार घेतल्यापासून ५३ किलो वजनी गटात वर्चस्व गाजवले होते. पण तिच्यावर मीनाक्षीने वारंवार घट्ट पकड ठेवली आणि तिला आपले आक्रमक कौशल्य वापरण्यापासून रोखले. सुरुवातीला अंतिमने मिनाक्षीचे दोन्ही पाय पकडण्याचा प्रयत्न केला, पण तिचा हा डाव अयशस्वी ठरला. पराभवानंतर अंतिम काही काळ अविश्वासाने मॅटवरच पडून राहिली, तर मिनाक्षी हसत तिच्याकडे हात पुढे करून पुढे सरसावली.

दोन वेळची राष्ट्रीय चॅम्पियन, २५ वर्षीय मिनाक्षी, सोनीपतमध्ये माजी राष्ट्रीय प्रशिक्षक कुलदीप मलिक यांच्या मार्गदर्शनाखाली प्रशिक्षण घेते. ती पूर्वी ५० किलो वजनी गटात स्पर्धा करत होती, पण आता ५३ किलो वजनी गटात स्पर्धा करते. मिनाक्षी म्हणाली, चाचणी स्पर्धा जिंकणे हा एक खूप आनंदाचा अनुभव आहे. मी या क्षणाचा आनंद घेत आहे. पूर्वी, मोठ्या नावांच्या खेळाडूंसमोर चांगली कामगिरी करूनही माझा पराभव व्हायचा, पण यावेळी मी माझा वेळ वाया घालवला नाही. मला माझ्या क्षमतेबद्दल शंका होती, पण मी त्यावर मात केली. अंतिम फेरीतही माझ्याकडून चुका झाल्या आणि मी त्याचा फायदा करून घेतला.

आशियाई चॅम्पियनशिप ६ ते ११ एप्रिल दरम्यान किर्गिझस्तानची राजधानी बिश्केक येथे होणार आहे. दरम्यान, नीलमनेही ५० किलो वजनी गटात उत्कृष्ट कामगिरी करत भारतीय संघात आपले स्थान निश्चित केले. इतर गटांमध्ये मानसी अहलावत (६२ किलो) आणि मनीषा भानवाला (५७ किलो) यांनी विजय मिळवला. मनीषाने ६२ किलोवरून ५७ किलो वजनी गटात प्रवेश केल्यामुळे या गटात कमी कुस्तीपटूंनी भाग घेतला. याशिवाय, हंसिका (५५ किलो), नेहा संगवान (५९ किलो), मोनिका (६५ किलो), मानसी लाथेर (६८ किलो), हर्षिता (७२ किलो) आणि काजल (७६ किलो) यांनीही आपापल्या गटात विजय मिळवला.

---------------

हिंदुस्थान समाचार / वृषाली देशपांडे