ऑकलंड, 18 मार्च (हिं.स.)न्यूझीलंडचा स्टार अष्टपैलू क्रिकेटपटू ग्लेन फिलिप्स पुन्हा एकदा चर्चेत आहे. यावेळी तो त्याच्या क्रिकेट कौशल्यामुळे नव्हे, तर त्याच्या वैमानिक कौशल्यामुळे चर्चेत आहे. फिलिप्सने ऑकलंडच्या आर्डमोर एअरड्रोमवर विमान यशस्वीरित्या उतरवून सर्वांना आश्चर्यचकित केले, ज्याचा व्हिडिओ सोशल मीडियावर वेगाने व्हायरल होत आहे. त्याने आपल्या इन्स्टाग्राम अकाऊंटवर हा व्हिडिओ शेअर केला असून, त्यात त्याचे अत्यंत तांत्रिक लँडिंग दिसत आहे.

फिलिप्स त्याच्या उत्कृष्ट क्षेत्ररक्षण, स्फोटक फलंदाजी आणि उपयुक्त गोलंदाजीसाठी आधीच ओळखला जातो, पण आता त्याने आकाशातही उत्कृष्ट कामगिरी करू शकतो हे सिद्ध केले आहे. तो सध्या व्यावसायिक वैमानिक परवाना (कमर्शियल पायलट लायसन्स) मिळवण्यासाठी प्रयत्न करत आहे आणि अलीकडेच त्याने एका फ्लाइंग स्कूलमधील विद्यार्थी आणि प्रशिक्षकांची भेट घेतली.

फिलिप्सने सांगितले की, त्याला विमान उडवण्याची आवड आहे आणि जर तो क्रिकेटपटू नसता, तर वैमानिक होणे ही त्याची पहिली पसंती असती. त्याने पुढे सांगितले की क्रिकेटनंतर तो वैमानिक म्हणून करिअर करण्याचा विचार करू शकतो. फिलिप्स लवकरच आयपीएलमध्ये गुजरात टायटन्सकडून खेळताना दिसणार आहे.

---------------

हिंदुस्थान समाचार / वृषाली देशपांडे