नवी दिल्ली, 18 मार्च (हिं.स.) । इंडियन प्रीमियर लीग (आयपीएल) २०२६ च्या आधी, सनरायझर्स हैदराबादने एक मोठा निर्णय घेतला आहे. भारताच्या नुकत्याच झालेल्या टी-२० विश्वचषक विजयात महत्त्वाची भूमिका बजावणाऱ्या युवा फलंदाज इशान किशनची संघाने कर्णधार म्हणून नियुक्ती केली आहे. तो पॅट कमिन्सची जागा घेणार आहे. हा निर्णय संपूर्ण हंगामासाठी नाही. दुखापतीमुळे पॅट कमिन्स हंगामातील सुरुवातीचे काही सामने खेळू शकणार नाही. तो परत येईपर्यंत इशान संघाचे नेतृत्व करणार आहे.

अभिषेक शर्माची उपकर्णधार म्हणून नियुक्ती करण्यात आली आहे. फ्रँचायझीने आपल्या इंस्टाग्राम अकाउंटवर पोस्ट केले, पॅट कमिन्स दुखापतीतून सावरत आहे आणि हंगामाच्या सुरुवातीच्या सामन्यांमध्ये खेळू शकणार नाही. तो बरा होईपर्यंत, इशान किशन संघाचे नेतृत्व करेल आणि अभिषेक शर्मा उपकर्णधार असेल.इशानने या हंगामात झारखंडला सय्यद मुश्ताक अली ट्रॉफी जिंकून दिली. त्याने संपूर्ण हंगामात दमदार खेळ केला आणि याच कामगिरीमुळे त्याचे भारतीय संघात पुनरागमन झाले. इशान गेल्या वर्षीच हैदराबाद संघात सामील झाला आणि त्याने आपल्या स्फोटक फलंदाजीने साऱ्यांचेच लक्ष वेधून घेतले होते. पुन्हा एकदा सर्वांच्या नजरा त्याच्यावर असणार आहेत.

हैदराबाद आपल्या दुसऱ्या विजेतेपदाच्या शोधात आहे. संघाने २०१६ मध्ये डेव्हिड वॉर्नरच्या नेतृत्वाखाली आपले पहिले विजेतेपद पटकावले होते. २०२४ मध्ये, पॅट कमिन्सच्या नेतृत्वाखाली संघ अंतिम फेरीत पोहोचला होता. पण कोलकाता नाईट रायडर्सकडून पराभूत झाला. कमिन्सच्या नेतृत्वाखाली हैदराबादने अपवादात्मक कामगिरी केली आहे. हा संघ अत्यंत आक्रमक असून आपल्या स्फोटक फलंदाजीसाठी ओळखला जातो, ज्यामध्ये अभिषेक, इशान, हेनरिक क्लासेन, नितीश कुमार रेड्डी यांसारखे स्फोटक फलंदाज आहेत.

---------------

हिंदुस्थान समाचार / वृषाली देशपांडे