नवी दिल्ली, 22 मार्च (हिं.स.)जेडीयूचे माजी नेते के. सी. त्यागी यांनी राष्ट्रीय लोक दलात प्रवेश केला आहे. रविवारी नवी दिल्लीत आयोजित एका कार्यक्रमात त्यांनी पक्षात प्रवेश केला. यावेळी आरएलडीचे अध्यक्ष जयंत चौधरीही उपस्थित होते. त्यागी म्हणाले की, चौधरी चरण सिंग यांनी त्यांना अगदी लहान वयात हापूरमधून निवडणूक लढवण्यासाठी तिकीट दिले होते.

के.सी. त्यागी म्हणाले की, ते खासदार किंवा आमदार होण्यासाठी नव्हे, तर जयंत चौधरी यांना चौधरी चरण सिंग यांच्यासारखे झालेले पाहण्यासाठी आरएलडीमध्ये सामील झाले आहेत. ५२ वर्षांपूर्वी जेव्हा चौधरी चरण सिंग राष्ट्रीय लोक दलाची स्थापना करत होते, तेव्हा ते व्यासपीठावर उपस्थित होते. हे लक्षात घेण्यासारखे आहे की, के.सी. त्यागी यांनी अलीकडेच जेडीयू सोडली आहे.

ते पुढे म्हणाले की, मी माझ्या राजकीय कारकिर्दीची सुरुवात आरएलडीमधून केली. हा त्याचाच पुढचा टप्पा आहे. यात काही नवीन नाही. आम्ही चौधरी चरण सिंग यांची राहिलेली स्वप्ने पूर्ण करण्यास मदत करू. जेडीयू आणि आरएलडीमध्ये काहीही फरक नाही. एक काळ असा होता की नितीश कुमार आणि चौधरी अजित सिंग मिळून एक नवीन पक्ष स्थापन करण्याच्या तयारीत होते.

राष्ट्रीय लोक दलाने (आरएलडी) केसी त्यागी यांना पक्षात सामील होण्यासाठी आमंत्रित केले होते. गेल्या आठवड्यात, जेव्हा केसी त्यागी यांनी लिहिलेल्या पुस्तकाचे प्रकाशन झाले, तेव्हा जयंत चौधरी प्रमुख पाहुणे होते. जयंत चौधरी म्हणाले होते की, प्रत्येक पक्षाला केसी त्यागींसारख्या नेत्यांची गरज असते.

के. सी. त्यागी २००३ पासून जेडीयूशी संबंधित आहेत. समता पार्टी आणि जनता दल यांचे विलीनीकरण होऊन जेडीयूची स्थापना झाल्यानंतर, ते पक्षात सक्रियपणे सहभागी राहिले. त्यांनी सरचिटणीस, राजकीय सल्लागार आणि प्रवक्ते यांसारखी पदे भूषवली आहेत.

---------------

हिंदुस्थान समाचार / वृषाली देशपांडे