मियामी, २३ मार्च (हिंस.)मियामी ओपन टेनिस २०२६ मध्ये धक्कादायक निकालाची नोंद झाली. जागतिक क्रमवारीत अव्वल स्थानी असलेला कार्लोस अल्कारज तिसऱ्या फेरीतच पराभूत झाला. अमेरिकन टेनिसपटू सेबॅस्टियन कोर्डाने त्याला तीन सेटच्या अटीतटीच्या सामन्यात पराभूत केले.

अल्कारजने जानेवारीमध्ये ऑस्ट्रेलियन ओपन जिंकून करिअर ग्रँडस्लॅम पूर्ण केला होता. या मोसमात त्याने आतापर्यंत १७-२ अशी कामगिरी नोंदवली आहे. गेल्या आठवड्यात इंडियन वेल्सच्या उपांत्य फेरीत तो डॅनियल मेदवेदेवकडून पराभूत झाला होता.

दुसऱ्या सेटमध्ये ५-४ अशा स्थितीत कोर्डाकडे सर्व्हिस करून सामना जिंकण्याची संधी होती. पण अनुभवी अल्कारजने सलग पाच गेम्स जिंकून जोरदार पुनरागमन केले. तर कोर्डाने तिसऱ्या सेटमध्ये आपले वर्चस्व कायम ठेवत ६-३, ५-७, ६-४ असा विजय मिळवला.

सामन्यानंतर, अल्कारज म्हणाला, हा एक खडतर सामना होता. कोर्डा उत्कृष्ट खेळला आणि महत्त्वाच्या क्षणी त्याने माझ्यावर मात केली. दुसरीकडे आपल्या विजयावर कोर्डा म्हणाला, आजच्या सामन्यातील सर्वात महत्त्वाची गोष्ट म्हणजे आत्मविश्वास. मी प्रत्येक शॉटवर विश्वास ठेवला आणि अखेरीस यशस्वी झालो.

जागतिक क्रमवारीत ३६ व्या क्रमांकावर असलेला कोर्डा, अल्कारजला पराभूत करणारा सर्वात कमी रँक असलेला टेनिसपटू ठरला आहे. यापूर्वीचा अशी कामगिरी गेल्या वर्षी डेव्हिड गॉफिनने केली होती. कोर्डाचा पुढील सामना पात्रता फेरीतून आलेल्या मार्टिन लँडालुझशी होणार आहे.

---------------

हिंदुस्थान समाचार / वृषाली देशपांडे