नवी दिल्ली, 30 मार्च (हिं.स.)कोलकाता नाईट रायडर्स (केकेआर) संघ आयपीएल २०२६ मधील आपला पहिला सामना मुंबई इंडियन्सकडून ६ गडी राखून हरला. या पराभवानंतर केकेआरचा कर्णधार अजिंक्य रहाणे स्पष्टपणे नाराज दिसला. संघाच्या पराभवानंतर कॅमेरॉन ग्रीनची गोलंदाजी करण्याची असमर्थता हा चर्चेचा विषय बनला होता.

सामन्यानंतर याबद्दल विचारले असता, कर्णधार अजिंक्य थोडा नाराज दिसला. त्याने म्हटले की हा प्रश्न क्रिकेट ऑस्ट्रेलियाला विचारावा. आता, क्रिकेट ऑस्ट्रेलियाने (सीए) अखेर रहाणेच्या दाव्यांवर मौन सोडले आहे.

आयपीएल २०२६ च्या दुसऱ्या सामन्यात केकेआर मुंबई इंडियन्सकडून (एमआय) ६ गडी राखून हरला. २२०/४ धावा करूनही केकेआरला आपली आघाडी टिकवता आली नाही आणि मुंबईने पाच चेंडू शिल्लक असताना लक्ष्य गाठले. सामन्यानंतर रहाणेने पुष्टी केली की, पाठीच्या दुखापतीतून सावरल्यानंतर क्रिकेट ऑस्ट्रेलियाने कॅमेरॉन ग्रीनला गोलंदाजीसाठी अद्याप पूर्णपणे परवानगी दिलेली नाही.

तो म्हणाला, आशा आहे की, ग्रीन लवकरच गोलंदाजी सुरू करेल, ज्यामुळे संघाचा समतोल सुधारेल. आम्ही चांगली फलंदाजी केली, पण गोलंदाजीमध्ये योग्य समतोल साधणे खूप महत्त्वाचे आहे. ग्रीन गोलंदाजी का करू शकला नाही, असे विचारल्यावर रहाणे म्हणाला, तुम्ही हा प्रश्न क्रिकेट ऑस्ट्रेलियाला विचारायला हवा.

रहाणेच्या वक्तव्यानंतर निर्माण झालेल्या वादाच्या पार्श्वभूमीवर, क्रिकेट ऑस्ट्रेलियाने स्पष्ट केले की, टी-२० विश्वचषकादरम्यान झालेल्या पाठीच्या खालच्या भागाच्या दुखापतीतून ग्रीन अद्याप पूर्णपणे बरा झालेला नाही. क्रिकेट ऑस्ट्रेलियाच्या प्रवक्त्यानुसार, ग्रीनच्या गोलंदाजीचा भार हळूहळू वाढवला जात आहे. त्याला गोलंदाजीत परत येण्यासाठी १० ते १२ दिवस लागू शकतात. बोर्डाने स्पष्ट केले की, केकेआर व्यवस्थापनाला या परिस्थितीची आधीच पूर्ण कल्पना होती.

---------------

हिंदुस्थान समाचार / वृषाली देशपांडे