पाटणा, ५ मार्च (हिं.स.) मुख्यमंत्री नितीश कुमार यांच्यासह राष्ट्रीय लोकशाही आघाडी (एनडीए) च्या उमेदवारांनी राज्यसभा निवडणुकीसाठी उमेदवारी अर्ज दाखल केले. यामुळे बिहारच्या राजकारणात चांगलीच खळबळ उडाली होती. मुख्यमंत्री नितीश कुमार यांच्यासोबत, भारतीय जनता पक्षाचे (भाजप) नितीन नवीन आणि रामनाथ ठाकूर आणि राष्ट्रीय लोक मोर्चा (आरएलएम) चे उपेंद्र कुशवाह आणि शिवेश कुमार यांनीही आपले उमेदवारी अर्ज दाखल केले.
बिहार विधानसभेच्या संकुलातील विधानसभेच्या कार्यालय कक्षात सचिवांच्या उपस्थितीत सर्व उमेदवारांनी राज्यसभा निवडणुकीसाठी आपले उमेदवारी अर्ज सादर केले. उमेदवारी अर्ज दाखल करताना राजकीय वातावरण चांगलेच तापले होते. युतीचे अनेक वरिष्ठ नेते उपस्थित होते.
केंद्रीय गृहमंत्री अमित शहा, बिहारचे उपमुख्यमंत्री सम्राट चौधरी आणि विजय कुमार सिन्हा यांच्यासह जनता दल युनायटेड (जेडीयू) चे अनेक वरिष्ठ नेते यावेळी उपस्थित होते. नेत्यांनी उमेदवारांचे अभिनंदन केले आणि राज्यसभा निवडणुकीत त्यांच्या विजयाचा विश्वास व्यक्त केला.
जनता दल युनायटेडने राज्यसभा निवडणुकीसाठी मुख्यमंत्री नितीश कुमार यांना उमेदवारी दिली आहे. नितीश कुमार यांचा व्यापक राजकीय अनुभव आणि प्रशासकीय क्षमता बिहार आणि संसदेत देशाला फायदेशीर ठरेल असे पक्षाच्या नेत्यांचे म्हणणे आहे.
नामांकन दाखल झाल्यामुळे, बिहारमधील राज्यसभा निवडणुकीबाबत राजकीय हालचाली तीव्र झाल्या आहेत. सर्व पक्ष आता आपापल्या उमेदवारांचा विजय सुनिश्चित करण्यासाठी रणनीती आखण्यात व्यस्त आहेत. येत्या काळात राज्यसभा निवडणुकीबाबत बिहारच्या राजकारणात आणखी उलथापालथ होण्याची शक्यता आहे.
---------------
हिंदुस्थान समाचार / वृषाली देशपांडे
