नवी दिल्ली, 01 एप्रिल (हिं.स.)। सरकारी तेल विपणन कंपन्यांनी (ओएमसी) नवीन आर्थिक वर्ष २०२६-२७ च्या पहिल्याच दिवशी एटीएफ (एव्हिएशन टर्बाइन फ्युएल), म्हणजेच जेट इंधनाच्या दरात मोठी वाढ केली आहे. या दरवाढीमुळे जेट इंधनाची किंमत प्रथमच प्रति किलोलिटर दोन लाख रुपयांच्या पुढे गेली आहे. पश्चिम आशियातील सध्याच्या संकटामुळे देशात प्रथमच जेट इंधनाची किंमत दुप्पटीहून अधिक झाली आहे.
विशेष म्हणजे, सरकारी तेल विपणन कंपन्यांनी जेट इंधनाच्या दरात वाढ करण्याची ही सलग दुसरी वेळ आहे. आजच्या या दरवाढीमुळे नागरी विमान वाहतूक क्षेत्रातील कंपन्यांसह सर्वच विमान कंपन्यांच्या परिचालन खर्चात लक्षणीय वाढ होण्याची शक्यता आहे. या परिस्थितीत, हवाई प्रवास आता आणखी महाग होण्याची शक्यता आहे.
या संदर्भात दिलेल्या माहितीनुसार, दिल्लीत जेट इंधनाच्या दरात प्रति किलोलिटर १,१०,७०३.०८ रुपये म्हणजेच ११४.५ टक्क्यांनी वाढ करण्यात आली आहे. या दरवाढीनंतर दिल्लीत जेट इंधनाचा दर प्रति किलोलिटर २,०७,३४१.२२ रुपयांवर पोहोचला आहे. यापूर्वी, गेल्या महिन्यात १ मार्च रोजी एटीएफच्या दरात प्रति किलोलिटर ५,२४४.७५ रुपये म्हणजेच ५.७० टक्क्यांनी वाढ करण्यात आली होती.
तेल विपणन कंपन्यांनी आज केलेल्या दरवाढीनंतर, जेट इंधनाच्या (एटीएफ) दराने प्रथमच प्रति किलोलिटर २ लाख रुपयांचा टप्पा ओलांडला आहे. यापूर्वी, २०२२ मध्ये एटीएफच्या किमतींनी आतापर्यंतचा उच्चांक गाठला होता. त्यावेळी, रशियाने युक्रेनवर केलेल्या आक्रमणानंतर तेलाच्या किमती वाढल्याने जेट इंधनाचा दर प्रति किलोलिटर १.१० लाख रुपयांपर्यंत वाढला होता. तथापि, नंतर दरात घट होऊन तो १ लाख रुपयांच्या खाली आला होता.
अमेरिका, इस्रायल आणि इराण यांच्यात सुरू असलेल्या युद्धामुळे जागतिक ऊर्जा संकट निर्माण झाले आहे. या संघर्षामुळे कच्च्या तेलाच्या वाहतुकीसाठीचा एक महत्त्वाचा सागरी मार्ग असलेली होर्मुझची सामुद्रधुनी अक्षरशः बंद झाली आहे. परिणामी, या मार्गाद्वारे अनेक देशांना होणारा गॅस आणि कच्च्या तेलाचा पुरवठा जवळजवळ थांबला आहे. इतकेच नव्हे, तर या युद्धामुळे आणि होर्मुझच्या सामुद्रधुनीतील अडथळ्यामुळे कच्च्या तेलाच्या किमती गगनाला भिडल्या आहेत.
---------------
हिंदुस्थान समाचार / Suraj Chaugule
