मुंबई, 16 एप्रिल (हिं.स.)आपल्या निर्भीड शैली, आकर्षक रूप आणि क्रिकेटच्या मैदानातील स्फोटक फलंदाजीसाठी ओळखला जाणारा विनोद कांबळी सध्या खऱ्या आयुष्यात एका अत्यंत कठीण परिस्थितीतून जात आहेत. एकेकाळी आपल्या प्रतिभेने लाखो लोकांचे मन जिंकणाऱ्या कांबळींची सध्याची अवस्था कोणालाही कळवळायला लावणारी आहे. पण, दिलासादायक बाब ही आहे की या कठीण काळात तो एकटा नाही, त्यांचे जवळचे मित्र त्यांच्या प्रकृती सुधारण्याची आशा बाळगून आहेत.

कांबळीचा जवळचा मित्र, मार्कस कुटो म्हणाला, सुमारे एक वर्षापूर्वी कांबळीच्या मेंदूत रक्ताची गाठ आढळली होती, ज्यावर उपचार करण्यात आले. डॉक्टरांच्या मते, ही गाठ पूर्णपणे काढता येत नाही, त्यामुळे भविष्यात त्याला पक्षाघाताचा धोका आहे. सध्या तो चालू शकतो, पण त्याची स्मरणशक्ती पूर्वीसारखी तल्लख नाही आणि तो अनेक गोष्टी विसरतो.

कांबळीने दारू पूर्णपणे सोडली आहे, हे एक सकारात्मक चिन्ह आहे. पण, धूम्रपान त्याच्या आरोग्यासाठी एक मोठा धोका आहे. डॉक्टर आणि मित्रांच्या मते, जर त्याने हे सोडले नाही, तर त्याला भविष्यात गंभीर समस्यांना सामोरे जावे लागू शकते.

मी कांबळीच्या मित्रांचा एक WhatsApp Group बनवला आहे. या ग्रुपमध्ये बहुतांश क्रिकेटपटू आहेत. हे क्रिकेटपटू आपली ओळख न सांगता कांबळीसाठी आर्थिक मदत करत आहेत”, असं कुटो यांनी सांगितलं.

गेल्या वर्षी, प्रकृती अचानक खालावल्याने कांबळीला ठाण्यातील एका खाजगी रुग्णालयात दाखल करण्यात आले होते. त्याला लघवीचा संसर्ग आणि स्नायूदुखीचा त्रास होत होता. तपासणीदरम्यान त्यांच्या मेंदूत रक्ताची गाठ आढळून आली. त्यांच्यावर सुमारे दोन आठवडे उपचार करण्यात आले, त्यानंतर त्यांच्या प्रकृतीत सुधारणा झाली आणि त्यांना रुग्णालयातून डिस्चार्ज देण्यात आला. रुग्णालयातून बाहेर पडल्यानंतर कांबळी यांनी आपल्या चाहत्यांना नवीन वर्षाच्या शुभेच्छा दिल्या. त्याने लोकांना दारू आणि अमली पदार्थांपासून दूर राहण्याचे आवाहन केले, कारण वाईट सवयी आयुष्य उद्ध्वस्त करतात.

---------------

हिंदुस्थान समाचार / वृषाली देशपांडे