गडचिरोली, 27 एप्रिल (हिं.स.)
जिथे रस्ता नाही तिथे पोलीस पोहोचले आणि जिथे अंधार होता तिथे आता प्रकाशाची किरणे पोहोचली आहेत.” गडचिरोली पोलीस दलाने आपल्या सामाजिक बांधिलकीचा नवा अध्याय लिहित, हेडरी उपविभागातील अतिदुर्गम तुमरकोठी गावात २७ एप्रिल रोजी महाराष्ट्र राज्य विद्युत मंडळाच्या सहकार्याने वीज पुरवठा यशस्वीरीत्या सुरू केला आहे. माओवादाच्या छायेत असलेल्या या गावात पहिल्यांदाच विजेचा लखलखाट झाल्याने ग्रामस्थांच्या डोळ्यांत आनंदाश्रू तरळले.
तुमरकोठी हे गाव भौगोलिकदृष्ट्या अत्यंत दुर्गम असून वाहतूक आणि सुरक्षिततेच्या कारणास्तव अनेक दशकांपासून मूलभूत सुविधांपासून वंचित होते. मैलाचा दगड: १९ डिसेंबर २०२५ रोजी या ठिकाणी नवीन पोलीस स्टेशनची स्थापना करण्यात आली. समन्वय: पोलीस स्टेशनमुळे निर्माण झालेल्या सुरक्षित वातावरणात पोलीस दलाने महावितरणशी समन्वय साधला. कठीण भौगोलिक परिस्थिती आणि नक्षली दहशतीचे आव्हान असूनही आज गावात वीज पोहोचवण्यात यश आले.
केवळ वीज खांबापर्यंत आणून न थांबता, पोलिसांनी प्रत्येक घरात प्रकाश पोहोचावा यासाठी पावले उचलली आहेत. आज आयोजित कार्यक्रमात गावकऱ्यांना पोलीस दलाच्या वतीने १०० बल्ब, १०० होल्डर, वायर आणि इतर आवश्यक साहित्य मोफत पुरविण्यात आले. या सुविधेमुळे गावातील पिण्याच्या पाण्याचा प्रश्न सुटण्यास मदत होईलच, शिवाय विद्यार्थ्यांना आता रात्री अभ्यासासाठी हक्काचा प्रकाश मिळाला आहे.
तुमरकोठीचा कायापालट करण्यासाठी गडचिरोली पोलिसांनी गेल्या वर्षभरात अनेक ऐतिहासिक पावले उचलली आहेत: बस सेवा: १७ मार्च २०२६ रोजी स्वातंत्र्यानंतर प्रथमच तुमरकोठी ते अहेरी बस सेवा सुरू करण्यात आली. आरोग्य सेवा: २८ फेब्रुवारी २०२६ रोजी विशेष आरोग्य मेळाव्यात २०० हून अधिक नागरिकांवर मोफत उपचार करण्यात आले. पायाभूत सुविधा: पोलीस दलाच्या संरक्षणात जिल्ह्यात आतापर्यंत ५५९ मोबाईल टॉवर्स, ४२४ किमी रस्ते आणि ६५ पुलांचे बांधकाम पूर्ण करण्यात आले आहे.
या प्रसंगी बोलताना पोलीस अधीक्षक एम. रमेश यांनी आशा व्यक्त केली की, “विद्युत पुरवठ्यामुळे नागरिकांचे शिक्षण आणि आरोग्य यात सकारात्मक बदल होतील. दुर्गम भागातील बांधवांना मुख्य प्रवाहात आणण्यासाठी गडचिरोली पोलीस दल सदैव तत्पर आहे.”
हा ऐतिहासिक उपक्रम पोलीस अधीक्षक एम. रमेश, अपर पोलीस अधीक्षक (अभियान) कार्तिक मधीरा, अपर पोलीस अधीक्षक (प्रशासन) गोकुल राज जी. आणि उपविभागीय पोलीस अधिकारी योगेश रांजणकर यांच्या मार्गदर्शनाखाली पार पडला. यात सीआरपीएफचे पोनि. होनप्पा, तुमरकोठीचे प्रभारी अधिकारी पोउपनि. गोरखनाथ सुरासे आणि कनिष्ठ अभियंता रोशन मानकर यांनी विशेष परिश्रम घेतले.
---------------
हिंदुस्थान समाचार / Milind Khond
