अहमदाबाद, 05 एप्रिल (हिं.स.)रवी बिश्नोईच्या भेदक गोलंदाजीच्या जोरावर राजस्थान रॉयल्सने गुजरात टायटन्सवर विजय मिळवला. राजस्थानने हा रोमांचक सामना ६ धावांनी जिंकला. पंजाब किंग्सविरुद्धचा सलामीचा सामना गमावल्यामुळे गुजरातची आयपीएल २०२६ मध्ये सुरुवात खराब झाली. दुखापतीमुळे शुभमन गिल संघाबाहेर होता आणि त्याच्या जागी राशिद खानने संघाचे नेतृत्व केले.
२११ धावांच्या विशाल लक्ष्याचा पाठलाग करताना, गुजरातने दमदार सुरुवात केली आणि शेवटच्या चेंडूपर्यंत सामना रोमांचक ठेवला. गुजरात टायटन्सने चांगली सुरुवात केली. कुमार कुशाग्र आणि साई सुदर्शन यांनी ७.६ षटकांत पहिल्या विकेटसाठी ७८ धावा जोडल्या. कुशाग्र १८ धावांवर बाद झाला, पण सुदर्शनने आपली प्रभावी फलंदाजी सुरूच ठेवली. त्याने ४४ चेंडूंमध्ये ९ चौकार आणि ३ षटकारांसह ७३ धावा केल्या. जोस बटलर (२६ धावा, १४ चेंडू) आपल्या चांगल्या सुरुवातीचे मोठ्या खेळीत रूपांतर करू शकला नाही. ग्लेन फिलिप्स अवघ्या तीन धावांवर बाद झाला, तर वॉशिंग्टन सुंदर केवळ चार धावाच जोडू शकला. राहुल तेवतियाने १२ धावा आणि शाहरुख खानने ११ धावा करून संघाला उभारी दिली.
शेवटच्या षटकांमध्ये, रशीद खान आणि कागिसो रबाडा यांनी ३० चेंडूंमध्ये ४३ धावांची जलद भागीदारी करून सामना रोमांचक बनवला. रशीदने १६ चेंडूंमध्ये २४ धावा केल्या, तर रबाडा १६ चेंडूंमध्ये २३ धावांवर नाबाद राहिला. पण, शेवटच्या दोन षटकांमध्ये जोफ्रा आर्चर आणि तुषार देशपांडे यांच्या अचूक गोलंदाजीने सामन्याचे चित्र पालटले.
यापूर्वी, नाणेफेक जिंकून प्रथम फलंदाजी करण्याचा निर्णय घेतल्यानंतर राजस्थान रॉयल्सने दमदार सुरुवात केली. यशस्वी जयस्वाल आणि वैभव सूर्यवंशी यांनी शानदार फलंदाजी करत ६.२ षटकांत पहिल्या विकेटसाठी ७० धावा जोडल्या. वैभवने १८ चेंडूंमध्ये पाच चौकार आणि एका षटकारासह ३१ धावा केल्या. यशस्वीने ३६ चेंडूंमध्ये ५५ धावांची शानदार खेळी केली.
तिसऱ्या क्रमांकावर फलंदाजीला आलेला ध्रुव जुरेल उत्कृष्ट फॉर्ममध्ये होता आणि त्याने ४२ चेंडूंमध्ये ७५ धावा केल्या. जुरेलने आपल्या खेळीत पाच चौकार आणि पाच षटकार मारले. जुरेल आणि यशस्वीने दुसऱ्या विकेटसाठी ५६ धावांची महत्त्वपूर्ण भागीदारी केली. शिमरॉन हेटमायरने आठ चेंडूंमध्ये १८ धावा केल्या.
कर्णधार रियान पराग फलंदाजीत फारसा प्रभाव पाडू शकला नाही आणि तो आठ धावांवर बाद झाला. रवींद्र जडेजा सात धावांवर नाबाद राहिला. जुरेल आणि यशस्वी यांच्या शानदार खेळीमुळे राजस्थान रॉयल्सने २० षटकांत सहा गडी गमावून २१० धावा केल्या. गुजरात टायटन्सकडून कागिसो रबाडाने सर्वाधिक दोन बळी घेतले.
---------------
हिंदुस्थान समाचार / वृषाली देशपांडे
05 Apr 2026
