तेहरान, 07 एप्रिल (हिं.स.)।अमेरिका आणि इस्रायलने इराणवर संयुक्त हल्ले केल्याची माहिती समोर आली आहे. वृत्तानुसार, इराणच्या खार्ग बेटावर सलग हल्ले करण्यात आले असून, कोम शहराजवळील एका पुलालाही लक्ष्य करण्यात आले. दरम्यान, आयआरजीसीने (इस्लामिक रिव्होल्युशनरी गार्ड कॉर्प्स) अमेरिकेला ‘लक्ष्मणरेषा’ ओलांडू नये, असा इशारा दिला आहे.

प्रांताचे उपराज्यपाल मोर्तेझा हेदरी यांनी माहिती दिली की, मंगळवारी अमेरिका आणि इस्रायलने इराणच्या कोम शहराजवळील एका पुलावर हल्ला केला. सरकारी दूरदर्शन वाहिनीच्या माहितीनुसार, तेहरानच्या दक्षिणेला असलेल्या कोम शहराबाहेर हा हल्ला झाला. उपराज्यपाल मोर्तेझा हेदरी यांनी सांगितले की, “काही मिनिटांपूर्वी कोमच्या संपर्क मार्गांवरील एका पुलाला लक्ष्य करण्यात आले.” त्यांनी दावा केला की हा हल्ला अमेरिकन आणि झायनिस्ट शत्रूंच्या प्रोजेक्टाइलद्वारे करण्यात आला. हल्ल्यानंतर परिसरात तणाव वाढला आहे.

इराणच्या ईशान्येकडील मशहद शहरात रेल्वे सेवा अचानक थांबवण्यात आली आहे. सुरक्षेच्या कारणास्तव हा निर्णय घेण्यात आला. माध्यमांच्या वृत्तानुसार, शहराच्या राज्यपालांनी केंद्रीय रेल्वे स्थानकावरून सुटणाऱ्या सर्व गाड्या तात्काळ रद्द करण्याचे आदेश दिले आहेत. न्यूज एजन्सीनुसार, हा खबरदारीचा उपाय असून पुढील आदेशापर्यंत तो लागू राहणार आहे. इस्रायलने इराणी नागरिकांना रेल्वेपासून दूर राहण्याचा इशारा दिल्यानंतर हा निर्णय घेण्यात आला आहे.

दरम्यान, न्यूज एजन्सीने दिलेल्या माहितीनुसार, इराणमधील काशान शहरात रेल्वे पुलावर इस्रायलने हल्ला केला. या हल्ल्यात दोन जणांचा मृत्यू झाला. हा हल्ला मध्य इराणमधील यहया आबाद रेल्वे पुलावर करण्यात आला. इस्फहानचे उपराज्यपाल यांनी या घटनेत दोन जणांचा मृत्यू झाल्याची पुष्टी केली आहे. यापूर्वी इस्रायली सैन्याने इशारा देत इराणी नागरिकांना रात्री नऊ वाजेपर्यंत रेल्वेने प्रवास करू नये, असे सांगितले होते.

याआधी सोमवारी अमेरिकेचे राष्ट्राध्यक्ष डोनाल्ड ट्रम्प यांनी व्हाईट हाऊसमध्ये पत्रकार परिषद घेतली होती. यावेळी त्यांनी इशारा देत म्हटले होते की, “संपूर्ण इराणला एका रात्रीत उद्ध्वस्त करता येऊ शकते आणि कदाचित ते उद्याच (मंगळवारी) घडू शकते.” मात्र, मध्यस्थांच्या माध्यमातून युद्धविरामासाठी चर्चा सुरू असल्याची माहितीही त्यांनी दिली होती. तरीही अद्याप कोणतीही ठोस प्रगती झालेली नाही.

---------------

हिंदुस्थान समाचार / Priyanka Bansode