नवी दिल्ली, 20 मे (हिं.स.)। काँग्रेसने केंद्र सरकारवर आरोप केला की, ग्रेट निकोबार बेट प्रकल्पासंदर्भातील पर्यावरणीय चिंता मांडणाऱ्यांना चीनसमर्थक ठरवून सरकार मुद्द्याला दुसरीकडे वळवण्याचा प्रयत्न करत आहे.

पक्षाचे संपर्क विभागाचे प्रभारी महासचिव जयराम रमेश यांनी सोशल मीडिया प्लॅटफॉर्म एक्सवरील पोस्टमध्ये म्हटले की, सरकारची भूमिका विरोधकांना बदनाम करण्यासारखी आहे. वर्ष 2020 मध्ये लडाखमध्ये घडलेल्या घटनांनंतर सरकारच्या भूमिकेबाबत अनेक चिंता व्यक्त करण्यात आल्या होत्या. भारत आणि चीन यांच्यातील चर्चेदरम्यान काही भागांमध्ये पारंपरिक गस्त आणि अधिकारांशी संबंधित तरतुदींमध्ये बदल करण्यात आले. त्यांनी व्यापार तूट आणि धोरणात्मक बाबींचाही उल्लेख केला.

ते म्हणाले की, भारताला चीनच्या आर्थिक आणि धोरणात्मक आव्हानांना सामोरे जावे लागणार आहे, मात्र ग्रेट निकोबार प्रकल्प हा मुख्यतः व्यावसायिक प्रकल्प आहे. प्रस्तावित ट्रान्सशिपमेंट बंदराचा लष्करी संरचनेशी कोणताही संबंध नाही.

जयराम रमेश यांनी दावा केला की, अंदमान-निकोबार कमांडच्या काही भागांमध्ये लष्करी संरचनेच्या विस्तारासंबंधीच्या सूचनांकडे दीर्घकाळ दुर्लक्ष केले जात आहे.

या प्रकल्पामागे मोठे कॉर्पोरेट हितसंबंध गुंतले असण्याची शक्यता असल्याचा आरोप त्यांनी केला.त्यामुळे पर्यावरण आणि स्थानिक लोकसंख्येवर गंभीर परिणाम होण्याची भीती आहे. हा प्रकल्प पर्यावरणीय आणि मानवी दृष्टिकोनातून मोठे धोके निर्माण करू शकतो, असेही त्यांनी म्हटले.

---------------

हिंदुस्थान समाचार / Suraj Chaugule