लातूर, 21 मे, (हिं.स.)। चालू उन्हाळ्यात अहमदपूर तालुक्यात तापमानाचा पारा तब्बल ४३ ते ४४ अंश सेल्सिअसवर पोहोचला असून, या कडक उन्हाचा फटका आता वाहनांनाही बसू लागला आहे. आज २१ मे रोजी दुपारी दोन वाजेच्या सुमारास गंगाखेडकडून अहमदपूरकडे येणाऱ्या एका टाटा नेक्सॉन चारचाकी गाडीला अचानक भीषण आग लागल्याची धक्कादायक घटना टाकळगाव पाटीजवळ घडली. भररस्त्यात गाडीने पेट घेतल्याने परिसरात काही काळ खळबळ उडाली होती, मात्र चालकाच्या प्रसंगावधानाने मोठी जीवितहानी टळली आहे.

या घटनेची सविस्तर माहिती अशी की, सिंदगी येथील रहिवासी प्रशांत कमलाकर मुळे हे आपली टाटा नेक्सॉन कार (क्रमांक MH 55 B 0190) घेऊन गंगाखेड येथे गेले होते. तिथले आपले काम आटोपून ते खंडाळी मार्गे अहमदपूरकडे परत येत होते. दुपारी दोनच्या सुमारास कडक उन्हात त्यांची गाडी अहमदपूरनजीक टाकळगाव पाटीजवळ आली असता, अचानक गाडीच्या समोरच्या बोनेटमधून मोठ्या प्रमाणावर धूर निघत असल्याचे चालक प्रशांत मुळे यांच्या लक्षात आले. त्यांनी क्षणाचाही विलंब न लावता गाडी तत्काळ रस्त्याच्या बाजूला घेतली आणि नेमका धूर कुठून निघतोय हे पाहण्यासाठी ते खाली उतरले. ते उतरत असतानाच गाडीने अचानक रौद्ररूप धारण करत पेट घेतला.

कारला लागलेली आग एवढी भीषण होती की काही वेळातच आगीच्या ज्वालांनी संपूर्ण गाडीला वेढले. या घटनेची माहिती मिळताच अहमदपूर नगरपालिकेच्या अग्निशामक दलाला पाचारण करण्यात आले. अग्निशामक दलाचे अधिकारी कैलास सोनकांबळे, ड्रायव्हर कम ऑपरेटर अजित अंगद लाळे आणि फायरमॅन प्रशांत गायकवाड यांनी तातडीने बंबासह घटनास्थळी धाव घेतली. अग्निशामक दलाच्या जवानांनी पाण्याचा मारा करत आग विझवण्याचा आटोकाट प्रयत्न केला, परंतु तोपर्यंत आगीची तीव्रता जास्त असल्याने संपूर्ण गाडी जळून खाक झाली होती. सुदैवाने, धूर निघत असतानाच चालक वेळीच खाली उतरल्यामुळे या मोठ्या दुर्घटनेत कोणतीही जीवितहानी झाली नाही. तालुक्यात सध्या सुरू असलेल्या ४३ ते ४४ अंश सेल्सिअसच्या तीव्र तापमानामुळे गाडीच्या इंजिनमध्ये ओव्हरहीटिंग किंवा शॉर्टसर्किट होऊन ही आग लागली असावी, असा प्राथमिक अंदाज वर्तवला जात आहे.

---------------

हिंदुस्थान समाचार / Mahesh Madanrao Chitnis