नवी दिल्ली, 23 मे (हिं.स.)आप सोडून भाजपमध्ये सामील झालेले राज्यसभा खासदार राघव चड्ढा यांना एक महत्त्वपूर्ण जबाबदारी देण्यात आली आहे. त्यांची राज्यसभेच्या याचिका समितीच्या नव्या अध्यक्षपदी नियुक्ती करण्यात आली आहे. राज्यसभा अध्यक्ष सी. पी. राधाकृष्णन यांनी या समितीची पुनर्रचना करून त्यावर दहा सदस्यांची नियुक्ती केली आहे. चड्ढा यांची नियुक्ती तात्काळ प्रभावाने लागू झाली आहे.

राज्यसभा सचिवालयाने जारी केलेल्या अधिकृत अधिसूचनेद्वारे या नियुक्तीला दुजोरा देण्यात आला आहे. अधिसूचनेत म्हटले आहे की, अध्यक्ष सी. पी. राधाकृष्णन यांनी याचिका समितीची पुनर्रचना केली असून, ही नियुक्ती २० मे पासून प्रभावी झाली आहे. या महत्त्वपूर्ण समितीच्या अध्यक्षपदी चड्ढा यांची नियुक्ती करण्यात आली आहे. चड्ढा हे अलीकडच्या काळात त्यांच्या राजकीय घडामोडींमुळे चर्चेत आहेत.

चड्ढा यांच्या व्यतिरिक्त, देशभरातील इतर अनेक प्रमुख खासदारांचाही या १० सदस्यीय समितीत समावेश करण्यात आला आहे. या समितीचे इतर सदस्य हर्ष महाजन, गुलाम अली, शंभू शरण पटेल, मयंककुमार नायक, मस्तान राव यादव बीढा, जे. बी. माथेर हिशाम, सुभाषीश खुंटिया, रंगवारा नारझरी आणि संदोश कुमार पी. हे आहेत. ही समिती राज्यसभेत येणाऱ्या विविध याचिका आणि जनहिताच्या बाबींवर विचार करते.

दुसऱ्या एका अधिसूचनेत, राज्यसभा सचिवालयाने कळवले आहे की, २० मे २०२६ रोजी अध्यक्षांनी राज्यसभा सदस्य डॉ. मेनका गुरुस्वामी यांच्यावर एक मोठी जबाबदारी सोपवली आहे. कॉर्पोरेट कायदे (सुधारणा) विधेयक, २०२६ वरील संयुक्त समितीच्या सदस्य म्हणून त्यांची नियुक्ती करण्यात आली आहे. हे विधेयक कॉर्पोरेट जगताशी संबंधित नियमांमधील सुधारणांशी निगडित आहे.

---------------

हिंदुस्थान समाचार / वृषाली देशपांडे