लंडन, 15 जून (हिं.स.) ब्रिटिश सरकारने मुलांना डिजिटल जगाच्या धोक्यांपासून वाचवण्यासाठी एक मोठे पाऊल उचलले आहे. ब्रिटिश पंतप्रधान कीर स्टारमर यांनी सोमवारी जाहीर केले की, देशात १६ वर्षांखालील मुलांना सोशल मीडिया वापरण्यास पूर्णपणे बंदी घालण्यात येईल. गेमिंग आणि लाइव्हस्ट्रीमिंग सेवांवरही कडक निर्बंध लादले जातील.पंतप्रधान स्टारमर यांनी बंदी घालण्यात येणाऱ्या सोशल मीडिया प्लॅटफॉर्मची नावे अद्याप जाहीर केलेली नाहीत, पण त्यांनी हे स्पष्ट केले आहे की हा नियम पुढील वर्षाच्या सुरुवातीला लागू होईल.
या मोठ्या बदलाचा प्रस्ताव मांडताना पंतप्रधानांनी सांगितले की, मुलांना ऑनलाइन धोक्यांपासून वाचवण्यासाठी कठोर उपाययोजना आवश्यक आहेत. त्यांनी हे मान्य केले की या नियमाची अंमलबजावणी करणे सोपे नाही, परंतु मोठ्या तंत्रज्ञान कंपन्यांच्या वाढत्या प्रभावाविरुद्ध सरकारांनी ही जबाबदारी स्वीकारलीच पाहिजे.
तंत्रज्ञान कंपन्यांकडून होणाऱ्या संभाव्य विरोधावर पंतप्रधान स्टारमर यांनी ठाम भूमिका घेतली आणि म्हणाले की, मुलांना ऑनलाइन सुरक्षित ठेवणे हा आपल्या काळातील सर्वात मोठ्या वादांपैकी एक आहे. ते म्हणाले, मी आपल्या देशातील मुलांच्या सुरक्षिततेशी आणि आनंदाशी तडजोड करण्यास तयार नाही. हा निर्णय याबद्दल आहे की आपण कोणासोबत उभे आहोत: देशभरातील कुटुंबांसोबत, की सध्याच्या कुचकामी व्यवस्थेसोबत.
ब्रिटिश सरकार ख्रिसमसपूर्वी हा कायदा संसदेत मंजूर करण्याची योजना आखत आहे. जर सर्व काही योजनेनुसार झाले, तर ही ऐतिहासिक बंदी पुढील वर्षाच्या सुरुवातीला पूर्णपणे लागू होईल.
---------------
हिंदुस्थान समाचार / वृषाली देशपांडे
