बंगळुरू, 02 जून (हिं.स.) : कर्नाटकचे भावी मुख्यमंत्री डी. के. शिवकुमार यांनी गांधी परिवाराबद्दल तीव्र कृतज्ञता व्यक्त करत त्यांच्या राजकीय प्रवासात त्यांची भूमिका अत्यंत महत्त्वाची असल्याचे म्हटले आहे. ‘एक्स’ (पूर्वीचे ट्विटर) या सोशल मीडिया प्लॅटफॉर्मवर त्यांनी एक सविस्तर आणि भावनिक संदेश शेअर करत आपल्या राजकीय कारकिर्दीतील विविध टप्प्यांची आठवण करून दिली.

शिवकुमार यांनी सांगितले की, एका सामान्य कार्यकर्त्यापासून राज्याच्या नेतृत्वापर्यंतचा प्रवास घडताना गांधी परिवाराचा विश्वास, पाठिंबा आणि प्रेरणा सतत मिळत राहिली.

माजी पंतप्रधान राजीव गांधी यांचे स्मरण करताना त्यांनी म्हटले की, तरुण कार्यकर्ता असताना त्यांच्या क्षमतेची पहिली ओळख राजीव गांधींनी करून दिली. त्या काळातील विश्वास आणि प्रोत्साहनानेच त्यांचा आत्मविश्वास वाढला आणि सार्वजनिक जीवनात मोठी स्वप्ने पाहण्याची प्रेरणा मिळाली, असे ते म्हणाले.

काँग्रेस संसदीय पक्षाच्या अध्यक्षा सोनिया गांधी यांच्याबद्दल बोलताना शिवकुमार यांनी म्हटले की, खरे नेतृत्व कठीण काळातही विश्वास टिकवून ठेवण्यात असते आणि सोनिया गांधी यांनी त्यांच्या राजकीय प्रवासात हेच दाखवून दिले. लोकसभेतील विरोधी पक्षनेते राहुल गांधी यांचे त्यांनी मार्गदर्शक आणि प्रेरणादायी व्यक्तिमत्त्व म्हणून कौतुक केले. तसेच काँग्रेसच्या सरचिटणीस प्रियंका गांधी वद्रा या साध्या आणि कार्यकर्त्यांशी जोडलेल्या नेत्या असल्याचे त्यांनी नमूद केले.

आपल्या संदेशाच्या शेवटी शिवकुमार यांनी सांगितले की, गांधी कुटुंब हे नेतृत्व, विश्वास आणि लोकसेवेचे प्रतीक आहे. त्यांच्या मार्गदर्शनाखाली आणि कर्नाटकच्या जनतेच्या आशीर्वादाने ते राज्याच्या सर्वांगीण विकासासाठी पूर्ण समर्पणाने काम करतील.

-------------------------

हिंदुस्थान समाचार / वृषाली देशपांडे