नवी दिल्ली, 02 जून (हिं.स.) । : ‘वंदे मातरम्’ हे संपूर्ण गाणे प्रत्येक सार्वजनिक कार्यक्रमात अनिवार्यपणे गाण्याच्या मुद्द्यावर सुरू असलेल्या चर्चेदरम्यान काँग्रेसचे खासदार शशी थरूर यांनी या सक्तीवर प्रश्नचिन्ह उपस्थित केले आहे. त्यांनी म्हटले की, राष्ट्रगीताबद्दल आदर असणे आणि प्रत्येक वेळी ते पूर्ण स्वरूपात गाणे बंधनकारक करणे या दोन गोष्टी वेगळ्या आहेत.

यासंदर्भात बोलताना थरूर यांनी सांगितले की, वंदे मातरम् हे सर्वजण आदराने स्वीकारतात आणि बहुतेकांना त्याचे पहिले कडवेही तोंडपाठ आहे. मात्र प्रत्येक कार्यक्रमात संपूर्ण पाचही कडवे गाण्याचा आग्रह अनावश्यक आणि व्यवहार्य नसल्याचे त्यांनी स्पष्ट केले.

ते म्हणाले की, अनेक वर्षांपासूनची परंपरा अशी आहे की कार्यक्रमाच्या सुरुवातीला वंदे मातरम् एकदाच गायले जाते आणि राष्ट्रगान वेगळ्या वेळी सादर केले जाते. “आता काही जण प्रत्येक कार्यक्रमात संपूर्ण गीत दोनदा गाण्याचा आग्रह धरत आहेत, जो योग्य नाही,” असे ते म्हणाले.

थरूर यांनी पुढे नमूद केले की, या मुद्द्यावर कायदेशीर बंधन नाही, तर तो प्रामुख्याने परंपरेचा भाग आहे. त्यांनी केरळ सरकारची भूमिका आणि काही इतर अधिकाऱ्यांच्या मतभेदांचाही उल्लेख केला.

नवी दिल्लीतील एका कार्यक्रमाचा संदर्भ देत त्यांनी सांगितले की, तेथे ‘वंदे मातरम्’ दोनदा वाजवले गेले, ज्यामुळे उपस्थितांसाठी ते दीर्घ आणि थकवणारे ठरले. त्यामुळे प्रत्येक छोट्या कार्यक्रमात संपूर्ण गीत दोनदा गाण्याचा आग्रह योग्य नसल्याचे मत त्यांनी व्यक्त केले.

शेवटी थरूर यांनी सांगितले की, वंदे मातरम्’चा सर्वजण आदर करतात, पण या मुद्द्यावर व्यवहार्य आणि सर्वमान्य तोडगा निघायला हवा.

----------------------------

हिंदुस्थान समाचार / Priyanka Bansode