बेंगळुरू, 02 जून (हिं.स.)। कर्नाटकच्या राजकारणात नव्या पर्वाची सुरुवात होणार आहे. राज्याचे मनोनीत मुख्यमंत्री डी. के. शिवकुमार हे बुधवारी (३ जून) बेंगळुरू येथील लोक भवनमध्ये मुख्यमंत्रीपदाची तसेच गोपनीयतेची शपथ घेणार आहेत. राज्यपाल थावरचंद गहलोत हे सायंकाळी ४.०५ वाजता त्यांना पद आणि गोपनीयतेची शपथ देणार आहेत. या बहुप्रतीक्षित सोहळ्याच्या पार्श्वभूमीवर राजधानीत व्यापक तयारी करण्यात आली असून सुरक्षा व्यवस्थाही अभूतपूर्वरीत्या मजबूत करण्यात आली आहे.

राज्य सरकार आणि प्रशासनाच्या वतीने शपथविधी सोहळा भव्य करण्यासाठी सर्व आवश्यक व्यवस्था पूर्ण करण्यात आल्या आहेत. मुख्यमंत्रीपदाची शपथ घेताना डी. के. शिवकुमार यांच्यासोबत मंत्रिमंडळातील काही सदस्यही पद आणि गोपनीयतेची शपथ घेण्याची शक्यता आहे. मात्र, मंत्रिमंडळाच्या अंतिम स्वरूपाबाबत अद्याप अधिकृत घोषणा करण्यात आलेली नाही.

या सोहळ्यास काँग्रेसच्या सर्वोच्च नेतृत्वाची उपस्थिती राहण्याची शक्यता आहे. अधिकृत सूत्रांच्या माहितीनुसार, काँग्रेस अध्यक्ष मल्लिकार्जुन खरगे आणि लोकसभेतील विरोधी पक्षनेते राहुल गांधी यांच्यासह पक्षातील अनेक वरिष्ठ राष्ट्रीय नेते कार्यक्रमाला उपस्थित राहू शकतात. याशिवाय काँग्रेसशासित राज्यांचे मुख्यमंत्री तसेच इंडिया आघाडीतील अनेक प्रमुख नेत्यांनाही निमंत्रित करण्यात आले आहे.

राज्य सरकारच्या वतीने मान्यवर पाहुण्यांसाठी निमंत्रणपत्रिका वितरित करण्यात आल्या आहेत. सुमारे ८०० विशिष्ट अतिथींना या सोहळ्यास आमंत्रित करण्यात आले असून २,२०० हून अधिक प्रवेशपत्रे जारी करण्यात आली आहेत. मोठ्या संख्येने लोकप्रतिनिधी, उद्योग क्षेत्रातील प्रतिनिधी, सामाजिक संघटनांचे पदाधिकारी आणि विविध क्षेत्रांतील मान्यवर व्यक्तीही कार्यक्रमाला उपस्थित राहण्याची शक्यता आहे.

शपथविधी सोहळ्यास हजारो काँग्रेस कार्यकर्ते आणि समर्थक उपस्थित राहण्याची अपेक्षा आहे. हे लक्षात घेऊन लोक भवन आणि परिसरात विशेष सुरक्षा व्यवस्था करण्यात आली आहे. पोलिस प्रशासनाने गर्दी व्यवस्थापन, वाहतूक नियंत्रण आणि कायदा-सुव्यवस्था राखण्यासाठी अतिरिक्त पोलिस बंदोबस्त तैनात केला आहे. संवेदनशील भागांमध्ये देखरेख वाढविण्यात आली असून सुरक्षा यंत्रणा सातत्याने परिस्थितीवर लक्ष ठेवून आहेत.

कार्यक्रमादरम्यान संभाव्य वाहतूक कोंडी टाळण्यासाठी प्रशासनाने विशेष उपाययोजना केल्या आहेत. विधान सौध, विकास सौध आणि एमएस बिल्डिंग येथे कार्यरत अधिकारी व कर्मचाऱ्यांसाठी दुपारनंतर सुटी जाहीर करण्यात आली आहे, जेणेकरून शहराच्या मध्यवर्ती भागातील वाहतुकीवरील ताण कमी होईल. तसेच नागरिकांना पर्यायी मार्गांचा वापर करण्याचा सल्लाही देण्यात आला आहे.

---------------

हिंदुस्थान समाचार / Suraj Chaugule