कोलकाता, 20 जून (हिं.स.) : पश्चिम बंगालमधील दक्षिण चोवीस परगणा जिल्ह्यात राजकीय वातावरण तापले असून तृणमूल काँग्रेस (टीएमसी) नेते जहांगीर खान यांच्या अटकेनंतर आता त्यांच्या पत्नी रेजिना बीबी उर्फ सरिना यांनाही पोलिसांनी अटक केली आहे.

प्रशासनाच्या माहितीनुसार, पतीच्या अटकेनंतर रेजिना बीबी यांनी फलता परिसरात आयोजित केलेल्या आंदोलनांमुळे कायदा व सुव्यवस्थेची परिस्थिती बिघडण्याची शक्यता निर्माण झाली होती. त्यामुळे त्यांच्याविरुद्ध कारवाई करण्यात आली. या प्रकरणाची सुरुवात जहांगीर खान यांच्या अटकेपासून झाली. अटकेदरम्यानचा एक व्हिडिओ सोशल मीडियावर मोठ्या प्रमाणात व्हायरल झाला होता. या व्हिडिओमध्ये खान यांना दोरीने बांधून नेले जात असल्याचे दिसत होते. या घटनेमुळे त्यांच्या समर्थकांमध्ये तीव्र संताप पसरला.

पोलिसांच्या आरोपानुसार, पतीसोबत झालेल्या वागणुकीच्या निषेधार्थ रेजिना बीबी यांनी मोठ्या प्रमाणात लोकांना एकत्र केले आणि चक्का जाम आंदोलन घडवून आणले. परिस्थिती इतकी तणावपूर्ण झाली होती की समर्थकांची मोठी गर्दी पोलिस ठाण्याला घेराव घालण्याच्या आणि उग्र आंदोलन करण्याच्या तयारीत होती.फलता परिसरात मोठ्या प्रमाणात लोक जमा होऊ लागल्यानंतर परिस्थिती नियंत्रणाबाहेर जाण्याची शक्यता निर्माण झाली. त्यामुळे स्थानिक पोलिसांसह केंद्रीय सशस्त्र पोलीस दल (सीएपीएफ) यांनाही तैनात करण्यात आले. सुरक्षा दलांनी तत्परतेने कारवाई करत गर्दी पांगवली आणि परिस्थिती नियंत्रणात आणली.

पोलिसांच्या या कारवाईनंतर रेजिना बीबी काही काळ सार्वजनिकरीत्या दिसल्या नाहीत. परिसरात तणाव निर्माण करणे आणि मोठी गर्दी जमविण्याच्या आरोपांवरून पोलिसांनी कोणत्याही तक्रारीची वाट न पाहता स्वतःहून गुन्हा दाखल केला.रेजिना बीबी यांचा शोध सुरू असतानाच तपासादरम्यान त्यांचे अचूक ठिकाण समोर आले. त्यानंतर पोलिसांनी दक्षिण चोवीस परगणा जिल्ह्यातून त्यांना अटक केली. सध्या ती पोलिस कोठडीत असून या प्रकरणात पुढील चौकशी आणि कायदेशीर प्रक्रिया सुरू आहे.

-------------------------------------

हिंदुस्थान समाचार / अरुण जोशी