श्रीनगर, 03 जुलै (हिं.स.) : जम्मू-काश्मीरमधील गांदरबल जिल्ह्यात शुक्रवारी सकाळी झालेल्या अपघातात केंद्रीय राखीव पोलीस दलाच्या (सीआरपीएफ) वाहनाला अपघात होऊन सहा जवान जखमी झाले. श्रीनगर-लेह राष्ट्रीय महामार्गावरील सोनमर्ग (गगनगीर) बोगद्याजवळ हा अपघात घडला.

प्राथमिक माहितीनुसार, वाहनावरील चालकाचे नियंत्रण सुटल्याने ते रस्त्यावरून घसरून उलटले. अपघातात वाहनातील सहा सीआरपीएफ जवान जखमी झाले. घटनेची माहिती मिळताच बचाव पथके तातडीने घटनास्थळी दाखल झाली आणि मदतकार्य सुरू करण्यात आले.

जखमी जवानांवर घटनास्थळी प्राथमिक उपचार करण्यात आले. त्यानंतर पुढील उपचारासाठी त्यांना गुंड येथील सीआरपीएफ छावणीत तसेच जवळच्या रुग्णालयात दाखल करण्यात आले असून त्यांच्यावर वैद्यकीय उपचार सुरू आहेत.

या अपघाताची स्थानिक पोलिसांनी नोंद घेतली असून, नेमके कारण काय होते याचा तपास सुरू करण्यात आला आहे. अपघातामागील कारणांचा शोध घेण्यासाठी संबंधित यंत्रणा सखोल चौकशी करत असल्याची माहिती अधिकाऱ्यांनी दिली.---------------------

हिंदुस्थान समाचार / मनीष कुलकर्णी