नवी दिल्ली, 10 ऑगस्ट (हिं.स.)भारतीय क्रिकेटपटू जेमिमा रॉड्रिग्स आगामी आयसीसी महिला चॅम्पियन्स ट्रॉफी २०२७ साठी खूप उत्सुक आहे. पहिल्यांदाच आयोजित होत असलेल्या या स्पर्धेबद्दल जेमिमा म्हणाली की, तिच्या मानसिकतेत कोणताही बदल होणार नाही आणि नेहमीप्रमाणेच संघाला विजयाकडे नेणे हेच तिचे प्राधान्य असेल.

महिला क्रिकेटसाठीची पहिली आयसीसी चॅम्पियन्स ट्रॉफी १४ ते २८ फेब्रुवारी २०२७ दरम्यान श्रीलंकेत खेळवली जाईल. जेमिमा म्हणाली की, संघाने एकदा यशाची चव चाखली आहे आणि आता क्रिकेटपटूंना अव्वल स्थानी राहायचे आहे. ती म्हणाली, आम्ही एकदा यशाची चव चाखली आहे आणि अव्वल स्थानी असण्याचा अनुभव काय असतो हे आम्हाला माहीत आहे. तुम्ही जितकी जास्त वेळा यशाची चव चाखता, तितकी जास्त तुम्हाला तिथेच राहण्याची इच्छा होते. आमचा संघ त्या दिशेने काम करत आहे आणि ही चॅम्पियन्स ट्रॉफी खूप खास असणार आहे.

जेमिमाने पहिल्या महिला चॅम्पियन्स ट्रॉफीमध्ये खेळणे तिच्यासाठी विशेष असल्याचेही सांगितले. ती म्हणाली, महिला क्रिकेटमध्ये हे पहिल्यांदाच घडत आहे आणि मी पहिल्यांदाच याचा भाग होणार आहे. हे खूप विशेष असेल आणि मी त्यासाठी उत्सुक आहे. मानसिकतेच्या बाबतीत काहीही बदलत नाही. शेवटी, सर्व काही संघाबद्दल आहे आणि संघाला कसे जिंकवायचे यावरच आमचे नेहमी लक्ष असते.

चॅम्पियन्स ट्रॉफीपूर्वी, भारतीय संघ डिसेंबर २०२६ मध्ये दक्षिण आफ्रिकेचा दौरा करेल, जिथे दोन्ही संघ बहु-स्वरूपातील द्विपक्षीय मालिका खेळतील. जेमिमाने या मालिकेचे वर्णन खूप स्पर्धात्मक असे केले. ती म्हणाली, ही निश्चितच एक खूप रोमांचक मालिका असणार आहे. दोन्ही संघ खूप चांगली कामगिरी करत आहेत. अलीकडे आमच्यात खूप स्पर्धा निर्माण झाली आहे आणि आम्ही दक्षिण आफ्रिकेविरुद्ध अनेक सामने खेळलो आहोत. जगातील दोन अव्वल संघांसाठी दक्षिण आफ्रिकेत आमनेसामने येणे हे एक मोठे आव्हान असेल आणि आम्ही त्यासाठी उत्सुक आहोत.

---------------

हिंदुस्थान समाचार / वृषाली देशपांडे