जळगाव, 11 ऑगस्ट (हिं.स.) वैद्यकीय पदवी किंवा अधिकृत नोंदणी नसताना रुग्णांवर उपचार करणाऱ्या बोगस डॉक्टरांविरोधात पोलिसांनी कारवाई सुरू केली आहे. चोपडा तालुक्यातील वटार येथे एका व्यक्तीवर, तर भुसावळ शहरात एका क्लिनिकचालकावर पोलिसांनी कारवाई केली. दोन्ही प्रकरणांत संबंधितांकडे वैध वैद्यकीय पदवी नसल्याचे आढळून आल्याने पुढील कायदेशीर कारवाई सुरू करण्यात आली आहे. चोपडा तालुक्यातील वटार येथे पोलिस पथकाने पंचांसह मिळालेल्या माहितीच्या आधारे छापा टाकला. यावेळी अरुपकुमार अजय कुमार आढळ (वय ४१, मूळ रा. २४ परगणा, पश्चिम बंगाल, ह.मु. वटार) हा कोणतीही वैध वैद्यकीय पदवी किंवा नोंदणी नसताना रुग्णावर ॲलोपॅथिक औषधे व इंजेक्शनद्वारे उपचार करताना आढळून आला. त्याने सादर केलेली प्रमाणपत्रे वैद्यकीय व्यवसाय करण्यासाठी अमान्य असल्याचे पोलिसांच्या कारवाईत समोर आले. घटनास्थळावरून स्टेथॉस्कोप, विविध औषधे, इंजेक्शन्स तसेच वैद्यकीय साहित्य जप्त करण्यात आले असून त्याचा पंचनामा करण्यात आला आहे.

---------------

हिंदुस्थान समाचार / मनोहर कांडेकर