नवी दिल्ली, 12 ऑगस्ट (हिं.स.)भारतीय क्रिकेट संघ सप्टेंबरमध्ये अफगाणिस्तानविरुद्ध तीन सामन्यांची टी-२० आंतरराष्ट्रीय मालिका खेळणार आहे. बीसीसीआय आणि अफगाणिस्तान क्रिकेट बोर्ड (एसीबी) यांनी एका संयुक्त निवेदनात या मालिकेची घोषणा केली आहे. तिन्ही सामने दिल्लीतील अरुण जेटली क्रिकेट स्टेडियमवर खेळले जातील. पहिला टी-२० सामना १३ सप्टेंबरला, दुसरा १५ सप्टेंबरला आणि तिसरा १७ सप्टेंबरला होणार आहे. याचा अर्थ भारत आणि अफगाणिस्तान यांच्यातील संपूर्ण टी-२० आंतरराष्ट्रीय मालिका पाच दिवसांत पूर्ण होईल. या घोषणेमुळे बांगलादेशच्या आशांना मोठा धक्का बसला आहे.

भारत आणि बांगलादेश यांच्यातील द्विपक्षीय मालिका गेल्या वर्षी पुढे ढकलण्यात आली होती. बांगलादेशमधील राजकीय अशांततेमुळे प्रस्तावित मालिका पुढे ढकलण्यात आली होती. यानंतर, बांगलादेशने सप्टेंबरमध्ये भारताविरुद्ध मालिका आयोजित करण्याचा प्रस्ताव दिला होता. पण, आता सप्टेंबरसाठी अफगाणिस्तानविरुद्ध भारताचे वेळापत्रक निश्चित झाल्यामुळे, त्या मालिकेसाठीच्या बांगलादेशच्या आशा जवळजवळ संपुष्टात आल्या आहेत.

बीसीसीआयचे अध्यक्ष मिथुन मनहास यांनी सांगितले की, अफगाणिस्तानमधील क्रिकेटच्या विकासाला पाठिंबा देण्यासाठी आणि तेथील खेळाडूंना सर्वोच्च स्तरावर खेळण्याची संधी देण्यासाठी मंडळ कटिबद्ध आहे. त्यांनी सांगितले की, द्विपक्षीय क्रिकेटमुळे संघांना नियमितपणे बलाढ्य प्रतिस्पर्ध्यांविरुद्ध खेळण्याची आणि अनुभव मिळवण्याची संधी मिळते. बीसीसीआयचे मानद सचिव देवजित सैकिया यांनीही भारत-अफगाणिस्तान क्रिकेट संबंधांवर भाष्य केले. त्यांनी नमूद केले की, गेल्या काही वर्षांपासून दोन्ही संघांमध्ये नियमितपणे द्विपक्षीय सामने खेळले जात आहेत. सैकिया यांनी आठवण करून दिली की, २०१८ मध्ये भारताने अफगाणिस्तानच्या ऐतिहासिक पहिल्या कसोटी सामन्याचे आयोजन केले होते. तेव्हापासून, दोन्ही संघ विविध फॉरमॅटमध्ये नियमितपणे सामने खेळत आहेत.

अफगाणिस्तान क्रिकेट बोर्डाचे अध्यक्ष मीरवाईस अश्रफ यांनी ही मालिका अफगाणिस्तान क्रिकेटसाठी महत्त्वाची असल्याचे म्हटले आहे. ते म्हणाले की, भारतात द्विपक्षीय मालिका खेळणे हे दोन्ही मंडळांमधील दीर्घकालीन संबंधांमधील आणखी एक महत्त्वाचे पाऊल आहे. त्यांनी असेही नमूद केले की, अफगाणिस्तानने अलिकडच्या वर्षांत भारत आणि युएई या दोन्ही देशांमध्ये आपले घरचे सामने खेळले आहेत. त्यांनी बीसीसीआयच्या पाठिंब्याचे कौतुक केले आणि या मोठ्या मालिकेसाठी भारत हे एक योग्य ठिकाण असल्याचे म्हटले.

---------------

हिंदुस्थान समाचार / वृषाली देशपांडे