बीजिंग , 13 ऑगस्ट (हिं.स.)।अरुणाचल प्रदेशातील प्रत्यक्ष नियंत्रण रेषेच्या (एलएसी) जवळ भारत आणि चीन यांच्यात लष्करी तणाव निर्माण झाल्याच्या वृत्तांदरम्यान, चीनने बुधवारी परिस्थिती फार गंभीर नसल्याचे सांगत भारत-चीन सीमेवरील स्थिती सध्या सामान्य आणि स्थिर असल्याचा दावा केला.

चीनच्या परराष्ट्र मंत्रालयाचे प्रवक्ते गुओ जियाकुन यांनी सांगितले की, भारत आणि चीन सीमावर्ती भागात शांतता आणि स्थैर्य कायम राखण्यासाठी राजनैतिक तसेच लष्करी माध्यमांद्वारे संपर्कात आहेत.गुओ जियाकुन यांनी माध्यमांना दिलेल्या माहितीत सांगितले की, “सध्या चीन-भारत सीमेवरील परिस्थिती एकूणच सामान्य आणि स्थिर आहे.” त्यांनी सांगितले की, गेल्या आठवड्यात चीन-भारत सीमा प्रश्नांवरील सल्लामसलत आणि समन्वयासाठीच्या कार्य यंत्रणेची (WMCC) 36वी बैठक झाली. मात्र, या बैठकीबाबत त्यांनी अधिक तपशील देण्यास नकार दिला.

भारतीय सोशल मीडियावर समोर आलेल्या काही व्हिडिओंबाबत गुओ यांना प्रश्न विचारण्यात आला. या व्हिडिओंमध्ये अरुणाचल प्रदेशात चीनच्या लष्करी हालचाली वाढल्याचा दावा करण्यात आला होता. मात्र, गुओ यांनी या भागातील कथित लष्करी तणावाला थेट नकार दिला नाही. अरुणाचल प्रदेशाजवळील अलीकडील लष्करी घटना आणि चीनच्या वाढत्या लष्करी हालचालींबाबत विचारण्यात आलेल्या प्रश्नाला उत्तर देताना त्यांनी सांगितले की, भारत आणि चीन सीमावर्ती भागात शांतता व स्थैर्य कायम राखण्यासाठी राजनैतिक आणि लष्करी माध्यमांद्वारे संपर्क सुरू ठेवण्यास सहमत आहेत.

गुओ जियाकुन यांचे हे वक्तव्य भारतीय परराष्ट्र मंत्रालयाने मंगळवारी केलेल्या वक्तव्यानंतर आले आहे. भारतीय परराष्ट्र मंत्रालयाने म्हटले होते की, सीमेवरील परिस्थितीचा परिणाम भारत-चीनच्या संपूर्ण द्विपक्षीय संबंधांवर होतो. तसेच, सीमेवर गैरसमज आणि चुकीचे आकलन टाळण्यासाठी दोन्ही देश राजनैतिक आणि लष्करी माध्यमांचा वापर करण्यास सहमत असल्याचे भारताने सांगितले होते.

अरुणाचल प्रदेशातील सध्याच्या तणावपूर्ण परिस्थितीबाबत भारताकडून अद्याप अधिकृतपणे स्पष्ट माहिती देण्यात आलेली नाही. मात्र, या घडामोडींची माहिती असलेल्या सूत्रांनी नाव जाहीर न करण्याच्या अटीवर सांगितले की, जुलैच्या सुरुवातीला उच्च सुबनसिरी जिल्ह्यातील दुर्गम तक्षिंग भागात ही समस्या निर्माण झाली होती. त्यानंतर भारतीय आणि चिनी सैनिकांमध्ये अनेक वेळा आमनेसामने येण्याच्या घटना घडल्या.

भारत आणि चीन सध्या आपले द्विपक्षीय संबंध पुन्हा सुधारण्याचा प्रयत्न करत आहेत. 2020 मध्ये लदाख भागातील एलएसी वर निर्माण झालेला लष्करी तणाव आणि त्याच वर्षी जून महिन्यात गलवान खोऱ्यात झालेल्या हिंसक संघर्षानंतर दोन्ही देशांच्या संबंधांमध्ये दीर्घकाळ तणाव कायम आहे.

---------------

हिंदुस्थान समाचार / Priyanka Bansode