इस्लामाबाद, 13 ऑगस्ट (हिं.स.)।पाकिस्तानचे माजी पंतप्रधान इमरान खान यांच्या निकटवर्तीयांपैकी एक आणि त्यांच्या सरकारमध्ये मंत्री राहिलेले शेख रशीद यांनी स्वतःला कुख्यात दहशतवादी हाफिज सईदचा ‘गुलाम’ असल्याचे म्हटले आहे. यासोबतच शेख रशीद यांनी मंचावरून भारतालाही धमकी दिली.

शेख रशीद केवळ इस्लामाबादमध्ये लष्कर-ए-तैयबाच्या एका कार्यक्रमात सहभागी झाले नाहीत, तर त्यांनी स्वतःला हाफिज सईदचा समर्थक असल्याचेही सांगितले. या कार्यक्रमादरम्यान मंचावर लष्कर-ए-तैयबाचे अनेक कुख्यात दहशतवादीही उपस्थित होते. त्यामध्ये लष्करचा वरिष्ठ कमांडर शेख याकूब आणि संधू यांचा समावेश होता. कार्यक्रमाला संबोधित करताना शेख रशीद म्हणाले, “मी हाफिज सईद साहेबांचा गुलाम आहे.” रशीद यांनी पुढे सांगितले की, एकदा त्यांच्या फोनमध्ये हाफिज सईदचा फोन नंबर आढळला होता. त्यामुळे त्यांना अमेरिकेतून बाहेर काढण्यात आले होते.

यासोबतच शेख रशीद यांनी मंचावरून भारतालाही धमकी दिली. भारताविरोधात आक्रमक वक्तव्य करताना ते म्हणाले की, “भारताने पाकिस्तानकडे पाहिले तर तिथे ना एखादा पक्षी चिवचिवेल, ना मंदिरात घंटा वाजेल आणि भारतात पाकिस्तानविरोधात कोणतीही कारवाई होऊ शकणार नाही.”

शेख रशीद हे इमरान खान यांच्या पाकिस्तान सरकारमध्ये 2020 ते 2022 या काळात गृहमंत्री होते. ते अवामी मुस्लिम लीग पक्षाचे संस्थापक नेतेही आहेत. यापूर्वीही शेख रशीद भारतविरोधी वक्तव्यांमुळे चर्चेत राहिले आहेत. 2019 मध्येही त्यांनी भारताविरोधात अत्यंत आक्रमक वक्तव्ये केली होती आणि युद्ध तसेच अण्वस्त्रांचा उल्लेख केला होता.

हाफिज सईद हा दहशतवादी संघटना लष्कर-ए-तैयबाचा प्रमुख असून, भारताच्या मोस्ट वॉन्टेड दहशतवाद्यांच्या यादीत त्याचा समावेश आहे. मुंबईत 26/11 रोजी झालेल्या दहशतवादी हल्ल्याचा मास्टरमाइंड हाफिज सईद असल्याचे मानले जाते. तसेच पुलवामा येथे झालेल्या दहशतवादी हल्ल्यामागेही त्याचा हात असल्याचे मानले जाते.

हाफिज सईद जम्मू-काश्मीरमध्ये दहशतवादाला प्रोत्साहन देण्यासाठी दहशतवादी संघटनांना आर्थिक मदत पुरवत असल्याचे आरोप आहेत. अमेरिकेनेही हाफिज सईदला दहशतवादी घोषित केले असून, त्याच्यावर कोट्यवधी डॉलरचे बक्षीस जाहीर केले आहे.

---------------

हिंदुस्थान समाचार / Priyanka Bansode