नवी दिल्ली, 16 ऑगस्ट (हिं.स.) जागतिक क्रमवारीत अव्वल स्थानी असलेल्या बुद्धिबळपटू मॅग्नस कार्लसनने एका शानदार आणि अजिंक्य कामगिरीनंतर सलग दुसऱ्यांदा ई-स्पोर्ट्स विश्वचषकाचे विजेतेपद पटकावले. अंतिम सामन्यात टीम लिक्विडकडून खेळताना, कार्लसनने एका एकतर्फी सामन्यात बेलारूसी ग्रँडमास्टर डेनिस लाझाविचचा २-० असा पराभव केला. या नॉर्वेजियन बुद्धिबळपटूने अंतिम सामन्याचे दोन्ही सेट ३-१ ने जिंकले. तो संपूर्ण स्पर्धेत अजिंक्य राहिला आणि त्याने आपले यशस्वीपणे कायम राखले.

कार्लसन म्हणाला की, तो लाझाविचच्या मागील सामन्यांवर लक्ष ठेवून होता आणि त्याने आपल्या प्रशिक्षकांशी त्यावर चर्चा केली होती. त्याने स्पष्ट केले की, ऑनलाइन सामन्यांमध्ये लाझाविचविरुद्ध धोका पत्करण्याच्या त्याच्या रणनीतीमुळे त्याला पूर्वी फटका बसला होता, त्यामुळे यावेळी त्याने लाझाविचला कोणताही स्पष्ट रणनीतिक फायदा मिळू न देण्याचा प्रयत्न केला.

पाच वेळा विश्वविजेता ठरलेला हा कार्लसन म्हणाला, स्पर्धा अजिंक्य राहून पूर्ण केल्याचा मला खूप आनंद आहे. मी काहीतरी असामान्य करण्याचा प्रयत्न करत नव्हतो. मी मिळालेल्या संधींचा फायदा घेण्याचा आणि थोडी अनिश्चितता टिकवून ठेवण्याचा प्रयत्न केला.

कार्लसनने कबूल केले की स्पर्धेदरम्यान असे क्षण आले होते जेव्हा त्याला धोका जाणवला. अलीरेझा फिरौजा आणि निहाल सरिन यांच्याविरुद्धच्या सामन्यांचा संदर्भ देत तो म्हणाला की, परिस्थिती काही वेळा कठीण होती, पण अखेरीस एकही सामना न हरता तो चॅम्पियन बनण्यात यशस्वी झाला. चॅम्पियनशिपचा सामना 'बेस्ट-ऑफ-थ्री' सेट फॉरमॅटमध्ये होता. पहिले दोन सेट प्रत्येकी चार गेमचे खेळले गेले, तर तिसरा सेट, गरज पडल्यास, दोन गेमने विजेता ठरवणार होता.

---------------

हिंदुस्थान समाचार / वृषाली देशपांडे