रायगड, 23 ऑगस्ट (हिं.स.)। राजा शिवछत्रपती परिवार व रायगड परिवार यांच्या संयुक्त विद्यमाने आयोजित करण्यात आलेले रक्तदान शिबिर उत्साहात व यशस्वीरीत्या संपन्न झाले. ‘चला रक्तदान करूया... रक्तदान हेच सर्वश्रेष्ठ दान!’ या संदेशातून आयोजित करण्यात आलेल्या या शिबिराला नागरिकांचा उत्स्फूर्त प्रतिसाद मिळाला. शिबिरात अनेक रक्तदात्यांनी सामाजिक बांधिलकी जपत रक्तदान करून गरजू रुग्णांसाठी मदतीचा हात पुढे केला.

रविवार, २३ ऑगस्ट २०२६ रोजी नेरळ पश्चिम येथील धारप सभागृहात सकाळी १० ते दुपारी २ या वेळेत रक्तदान शिबिराचे आयोजन करण्यात आले होते. राजा शिवछत्रपती परिवार, रायगड परिवार यांच्या पुढाकाराने तसेच कर्जत प्रेस असोसिएशन, नेरळ फोटोग्राफर्स असोसिएशन आणि मातोश्री स्मृती चिंतामणी टिपणीस कला व वाणिज्य महाविद्यालय, ममदापूर-नेरळ यांच्या संयुक्त विद्यमाने हा सामाजिक उपक्रम राबविण्यात आला.

रक्ताची गरज असलेल्या रुग्णांना वेळेवर रक्त उपलब्ध व्हावे, तसेच समाजामध्ये रक्तदानाबाबत जनजागृती निर्माण व्हावी, या उद्देशाने शिबिराचे आयोजन करण्यात आले होते. युवकांसह विविध क्षेत्रातील नागरिकांनी शिबिरात सहभागी होत लक्षणीय प्रमाणात रक्तदान केले. रक्तदान करणाऱ्या प्रत्येक रक्तदात्याचे आयोजकांच्या वतीने आभार मानण्यात आले रक्त दान करणार्यांना प्रमाण पत्र व कार्ड देण्यात आले असून ते कार्ड आयोजकान कडे ठेवण्यात आले असून गरज भासल्यास त्यांना लगेच परत करण्यात येणार आहे असे आयोजकांनी सांगितले.

या उपक्रमामुळे सामाजिक बांधिलकी, सेवाभाव आणि एकोप्याचा संदेश समाजापर्यंत पोहोचला. ‘एकच ध्यास, गडकोट विकास’ या विचारासोबत सामाजिक कार्याची परंपरा पुढे नेण्याचा संकल्प आयोजकांनी व्यक्त केला. रक्तदान शिबिर यशस्वी करण्यासाठी सहकार्य करणारे सर्व रक्तदाते, संस्था, पदाधिकारी, स्वयंसेवक आणि नागरिकांचे आयोजकांनी विशेष आभार मानले.

---------------

हिंदुस्थान समाचार / संदेश साळुंके (रायगड)